Nuummi portørit ataasinngorpat sulinerminnik unitsitsigallalerput

Nuummi portørit ataasinngorneq 27. februar sulinerminnik unitsitsigallassapput, ataatsimiinnissartik pissutigalugu. Qaqugu qanorlu sivisutigisumik ataatsimiittoqassanersoq, maanna oqaatigisinnaanngilaat.

Portørit peqatigiiffianni siulittaasoq, Ujarak Jessen Heinrich Sermitsiaq.AG-mut ilisimatitsivoq Nuummi portørit sulinerminnik unitsitsigallarnissaat peqatigiiffiup akuerisimagaa.

Tusagassiorfinnut nalunaarummi erseqqissarneqarpoq Nuummi portørit suliassaqarnerulernissartik pillugu isummernissamut ataatsimeeqatigiissasut. Portørit peqatigiiffiani siulittaasoq annertunerusumik oqaaseqassanani, tusagassiorfinnulli nalunaarut innersuullugu Sermitsiaq.AG-mut ilisimatitsivoq.

Nuummi portørit aqutsisut ingerlatsinerat pillugu akerliliillutik sulinerminni unitsitsinissarnerat siullermiilinngilaq.

Suliat marloriaatinngussasut

Portørit ataatsimiinnerminni Naalakkersuisut peqqinnissaqarfimmut ikiorsiissutaat, ukioq nutaami nalunaarutigineqartut, oqaluuserissavaat.

Portørit naapertorlugit ikiorsiissutit nakorsanut, peqqissaasunut peqqinnissaqarfimmilu allanut tamanut iluaqutaasussatut aaqqissuunneqarsimapput, portørilli atugaannut iluaqutaasussanik immikkoortitsisoqarsimanani. Ikiorsiissutit, portørit naapertorlugit, portørit sulinerulernerannik kinguneqarput.

- Ilaatigut marloriaatinngortissagunarlugit. Sulisullu naammaqattartut amerlinagit. nunatsinni portørit peqatigiiffianni siulittaasoq, Ujarak Jessen Heinrich tusagassiorfinnut nalunaarummi allappoq.

SIK-p siulittaasua Jess G. Berthelsen ilisimatitsivoq sulisartut inuussutissarsiuteqartut kattuffiat suliamut oqaaseqarsinnaanngikkallartoq, suliap imarisaa suussusaalu paaseqqaartinnagu. Paasissutissat amerlanerusut pineqareersimalerpata, oqaaseqarnissaq naliliiffigineqassaaq.

Peqqissutsimut naalakkersuisoqarfiup peqqinnissaqarfimmi aqutsisut akissuteqartussatut innersuuppai. Suliamut tunngatillugu peqqinnissaqarfimmi aqutsisut oqaaseqartissallugit Sermitsiaq.AG-mit sulissuteqarpoq.