Nuummi politiit biilinik aallarussisunik malersuisariaqarsimasut
Biilit assartuutit qaqortut tallimanngornerup unnuaani aallarunneqarput. Politiit biilinik aallarussisunik malersuereersullu, biilinik aallarussisoq tigusarineqarpoq.
Nuup aqqusingerni politiit biilii ikittaartulerlutik biilinik qaqortunik tallimanngornerup unnuaani malersuipput.
Nuummi Arctic Importip biilii assartuutaasut qaqortut, aallarunneqarsimasut nalunaaqutaq 02.42 nalunaarutigineqarput, politiillu aqqusinermi angalaartuisa biilit aallarussat malersorlugit aallartippaat.
- Ilisimanngilara qanoq sivisutigisumik malersorneqarsimanersut, kisianni Nuup aqquserngini malersuisoqalaarpoq, Kalaallit Nunaata Politiivini pigaartut pisortaat Hans Peter Berthelsen Sermitsiaq.AG-mut ilisimatitsivoq.
Paasiniaaneq ingerlasoq
Hans Peter Berthelsen ilisimatitsivoq biilit malersorneqarnerini kingornalu tigusarinninnermi inunnik ajoqusertoqarsimanngitsoq. Biililli annikitsumik ajoquserneqalaalersimapput.
Biilinik aallarussisimasoq imigassartorsimanngilaq.
- Suliaq maanna paasiniaaffigineqarpoq, taassuma kingorna eqqartuussivikkut qanoq suliassanngortitsisoqarnissaa paasinarsissaaq, pigaartut pisortaat ilisimatitsivoq.
Pigaartut pisortaat ilisimatitsivoq biilinik aallarussisarnerit, aammalu biilinik aallarussisoqarsimatillugu malersuisariaqartarnerit nunatsinni akuttusinnaasartut.
Arctic Import Nuuk Facebookimini ilisimatitsivoq biilit aallarunneqartut innaallagiatortuusut.