Nuummi pilersuineq nalinginnaasumik ingerlaqqilerpoq
Nuuk erngup nukiganit innaallagiamik pilersorneqaqqilerpoq, imermillu pilersuineq aamma ingerlaqqilerluni. Innaallagiaq nalinginnaasumik atoqqissinnaalertoq, nalunaaqutaq 21.00 nalunaarutigineqarpoq. Innuttaasut aqagu anorersuarujussuarnissamut piareersarnissaat politiinit kaammattuutigineqarpoq.
Nuuk Utoqqarmiut Kangerluarsunnguani erngup nukiganik nukissiuummit innaallagissamik pilersorneqaqqilerpoq. Kalaallit Nunaanni Politiit marlunngornermi nal. 21.00 taama tusagassiorfinnut nalunaaruteqarput.
Nukissiorfimmiit erngup nukiganik nukissiorfiup aqqutai aqagu misissorneqassapput, ajoqutigineqartoq sorpiaarnersoq paasiniarlugu.
Erngup nukiganik nukissiuut nalinginnaasumik ingerlaqqilermat imermik pilersuineq aamma akornuteqarunnaartoq, politiit allapput.
Nuummi innuttaasut innaallagiamik, imermik kiassarnermillu nalinginnaasumik atuisinnaaleqqipput.
Orsersuigitsi oqortunillu qipittorlusi
DMI-p silamik ilimasaarutaa aqagumoortoq naapertorlugu nalunaaqutaq 14.00 missaani anorersualissangatinneqarpoq. Anorersuarnerani innaallagiamut, imermut kiassarnermullu pilersuinerup akornuserneqarsinnaanissaa naatsorsuutigineqarsinnaammat, Kalaallit Nunaata Politiivisa innuttaasut piareersaqqullugit kaammattorpai.
- Innuttaasut atortorissaarutitik orsigassat orsereertariaqarpaat, imermillu isumannaarsillutik, soorlu aamma oqortunik qipinnik sillimmateqarsinnaallutik, politiit siunnersuuteqarput.
Kommunimi sillimaniarnermi attavissaq matuneqarpoq
Kommuneqarfik Sermersooq ilisimatitsivoq pilersuineq nalinginnaasumik ingerlaqqilermat sullissinerat maanna nalinginnaasunngoqqittoq.
Oqarasuaat +299 367281 kommunimilu pigaartut attavissaat taamaattumik matuneqarallarput. Kommunimit ikiorneqarnissamik pisariaqartitsiguit inunnik isumaginnittoqarfimmi pigaartumut suli saaffiginnissinnaavutit.
Kalaallit Nunaata Politiivi Nuummi sillimaniarnerat nalinginnaasunngoqqippoq, sulili sillimasoqarpoq sulisullu arlallit piareersimatinneqarpoq innaallagissamik pilersuinerup kiperatarsinnaanera pissutigalugu.
Oqarasuaatit internetilu attaveqaqqilerput
Tusassip sullissineri tamarmik maanna nalinginnaasumik ingerlapput. Sianernerilli ilaat suli iluatsissinnaasanngillat, attaviit siarnguttunut malinnaaniapiloormata.
- Taamaattoqassappat misilillugu sianeqqinniaannassaatit, Tusass ilisimatitsivoq.
113 aamma atoqqilerpoq, 112-ilu upalungaarsimanermut oqartussanut suli attaveqartitsilluni.
Aqagu anorersuarujussuarnissaanut tunngatillugu Tusass ilisimatitsivoq Nuummi innaallagiamik pilersuineq ajutuussagaluarpat atuisut sms-ikkut ilisimatinneqarumaartut oqarasuaatinut attaviit akunnialuit ingerlaneranni kipisoorsinnaanerat pillugu.
Unnuap eqqissisimasuunissaanik oqartussat naatsorsuuteqarput, Nuummilu innaallagiaaruttoqarneranut tunngatillugu unnuap ingerlanerani nutaanik nalunaarusiortoqarnissaanik naatsorsuuteqannginnerarlutik.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...