Kunngikkormiut tikeraarnerat

Nuummi pilersaarutit: Kunngissap ilaqutaalu ukunani naapinneqarsinnaapput

Kunngikkormiusut ataqqinassusillit Nuummi pisortatigoortumik tikeraarnerat tallimanngorpat aallartissaaq nalunaaqutaq 09-miit

Kronprinsfamilien, Nanortalik
Kunngissaq ilaqutanilu Nanortalimmiittut

Kunngissaq Frederik ilaquttanilu kunngikkormiut umiarsuaannut Dannebrogimut ilaallutik Nuup talittarfianut sisamanngornermi tikissapput. Kunngissaq Frederik Nuup Kangerluani ulluni kingullerni piniaqataasoq, Nuummi pisortatigortumik tikeraarnerat tallimanngornermi aallartissaaq.

Hotel Hans Egedemi nereqatigiinnertalimmik sisamanngornermi sioqqutsilluni aallartissaaq nalunaaqutaq 19.00. Tassani Naalakkersuisut siulittaasuat Aleqa Hammond qaaqqusisuuvoq. KNR-ip paasissutissaatai malillugit kunngissap nuliatalu qitornaat unnussioqatigiinnermi peqataassanngillat.

Kunngissap ilaqutaatalu Nuummi tikeraarnerminni pilersaarutaat sisamanngornermi saqqummiunneqartoq:

Nal. 09.30
Kunngissakkut borgmesterimit Asii Chemnitz Narupimit Nuutoqaami tikilluaqquneqassapput.

Nal. 10.00
Kommunalbestyrelsip ataatsimiittarfianut pulaarneq, kulturikkut nittarsaassisuusimasoq Arnannguaq Gerstrøm aliikkusersuissaaq. Meeqqat kendamamik, karatemik balletsimillu takutitsissapput. Borgmesteri tikilluaqqusissaaq.

Nal. 10.45
Kunngissakkut Inatsisartut ataatsimiittarfiata tungaanut biilinik ingerlanneqassapput.

Nal. 11.00
Kunngissakkut Inatsisartut siulittaasuannit Lars Emil Johansenimit tikilluaqquneqassapput.

Nal. 11.30
Kunngissakkut Naalakkersuisut siulittaasuannit Aleqa Hammondimit tikilluaqquneqassapput.

Nal. 12.00
Kunngissakkut Pinngortitaleriffimmut pulaassapput, pisortamit Klaus Nygårdimit tikilluaqquneqassapput.

Nal. 13.30
Kunngissakkut kajumissutsimik suliallit ataatsimoorfiat pulaarnerani peqatigiiffilerineq, timersoqatigiiffilerineq pitsaaliunerlu pillugit oqaluttuunneqassapput, taakkununnga Mary Fondenip tapersersugaa kammagiitta eqqartorneqassalluni.

Nal. 14.00
Kunngissaq Arctic Winter Games pillugu pisortamit Maliina Abelsenimit saqqummiiffigineqassaaq.

Nal. 14.10
Kunngissap nuliata Meeqqat Inuusuttullu Oqaloqatigiinnittarfiat MIO pulaassavaa meeqqat illersuisuannit Aaja Chemnitz Larsenimit tikilluaqquneqassalluni - tassani Kunngissaq Frederik suli Maliina Abelsenimit saqqummiiffigineqassaaq.

Nal. 14.45
Kunngissakkut Katuami kaffillernermi peqataassapput. Kaffillertoqarnerani nipilersortoqarlunilu eqqumiitsulianik saqqummersitsisoqassaaq meeqqallu atuagaannik kalaallillu ilusilersugaannik saqqummersitsisoqassalluni.

Nal. 16.00
Kunngissakkut Issittumi Sakkutooqarfik pulaassavaat.

Nal. 17.00
Kunngissakkut Aningaasaateqarfik Ivalo & Minik-up ilassinninneranni peqataassapput.

Nal. 19.00
Kunngissakkut kunngikkut umiarsuaanni Dannebrogimi ilassinnissapput.

Kommuneqarfik Sermersuumi borgmesterip Asii Chemnitz Narupip tikeraartut Nuup Mittarfiani nalunaaqutaq 09.45 inuulluaqqussavai.

Powered by Labrador CMS