Nuummi Paamiunilu assagiarsunniarneq unitsinneqassaaq
Kalaallit Nunaanni Aalisarnermut Akuersissutinik Nakkutilliisoqarfiup aalajangerpaa aqutsiveqarfimmi Nuummi Paamiunilu assagiarsunniarneq unitsikkallarneqassasoq.
Aqutsiveqarnermi 2019-imi Nuummi Paamiunilu assagiarsuttassat tamakkerlugit suli aalisarneqanngikkaluartut, taamaattoq aqutsiveqarfimmi assagiarsunniarneq piffissami aalajangersimasumi unitsinneqarallartussanngorpoq.
Kalaallit Nunaanni Aalisarnermut Akuerisussitinik Nakkutilliisoqarfik tusagassiutinut taama nalunaaruteqarpoq.
Tamanna isumaqarpoq Nuummi Paamiunilu aasaanerani assagiarsunniartoqassanngitsoq.
- Aalisariutit pisassiissutaasunit 1.200 tonsiusunit 560 tonsit marsip 31-ata tungaanut 2019-imi aalisarsimavaat, pisassiissutinit 47 procentit aalisarneqarsimallutik. Taamaattumik naatsorsuutigineqarsinnaassaaq aalisartoqaannarpat pisassiissutigineqartut ukioq naatinnagu nungunnissaat, nakkutilliisoqarfik aalisarnermut unitsitsigallarneq pillugu nassuiaavoq.
Ulloq kingulleq
Nakkutilliisoqarfiup ilisimatitsissutigaa pingasunngorneq apriilip qulingat 2019-imi unnuap qeqqanut kingusinnerpaamik assagiarsunnik tunisisoqarsinnaasoq. Taamatuttaaq ulloq taanna unnuap qeqqartinnagu pullatit qaqinneqareersimassapput.
Nuummi Paamiunilu assagiarsunniarneq oktobarip aallaqqaataani 2019-imi aallarteqqinneqassaaq, ukiumullu pisassiissutigineqartut katillugit 1.200 tonsiusut sinneri aalisarneqarsinnaalissallutik, nalunaarummi ilisimatitsissutigineqarpoq.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...