Nuummi nutaanik arfinilinnik tunillatsittoqarsimasoq

Ullormi kingullermi misissortissimasunit 600-sunit arfinillit coronavirusimik tunillatsissimapput.

Nunatsinni Nakorsaaneqarfiup nittartakkamigut ilisimatitsissutigaa, tunillatsissimasut nutaat arfinillit ilaatigut atuarfinni allani nassaarineqarsimasut;

- USK-imi (Nuummi atuarfimmi) klassimi ataatsimi aamma Ilisimatusarfimmi klassimi ataatsimit tunillatsittoqarsimavoq, Nunatsinni Nakorsaaneqarfik nittartakkamigut allappoq.

Nakorsaaneqarfimmit oqaatigineqarpoq, sapaatip akunnerani 38-mi katillugit 96-it tunillatsissimasut, taakkunannga 92-it Nuummi tunillatsissimallutik, tunillatsissimasullu sapaatip akunnerata siulianut sanilliullugit amerlanerullutik:

- Nuummi inuit 100.000-iusuuppata taakkunannga 480-it tunillatsissimallutik. Sapaatip akunnerata siuliani, sapaatip akunnerani 37-mi, tunillatsissimasut katillutik 74-iusimapput, taakkunannga 71-it Nuummi tunillatsissimallutik.

- Taamaalilluni suli tuniluuttoqarpoq, Nunatsinni Nakorsaaneqarfik inerniliivoq.

Akiuussutissalerneqarsimasut amerliartortut

Nakorsaaneqarfiup aamma akiuussutissalersuinermi killiffik saqqummiuppaa, tassa Kalaallit Nunaanni tamarmi tamakkiisumik akiuussutissalerneqarsimasut sapaatip akunnerani kingullermi 61,8 procentiusimariarlutik 63,5 procentinngorsimapput.

Innuttaasut aappassaanik kapitinneqanngitsut amerlassusaat ikiliartorput, sulili inuit 3.900-t missaanniittut ataasiannaarlutik kapitissimapput, aappassaanillu suli kapitissimanatik. Sapaatip akunnerani kingullermi inuit 274-it akiuussutissalersorneqarnerat aallartinneqarpoq.

Powered by Labrador CMS