Nuummi neriniartarfinnit imerniartarfinnillu nalunaarut
Neriniartarfiutillit assigiinngitsutigut matooraasoqartarnera nukillalaarnartippaat, inuiaqatigiinnilu matusinissamik aalajangiisoqartillugu oqartussanit paasissutissinneqartarnissaq amigaatigalugu. - Oqartussat inuiaqatigiinnik matusiniarlutik aalajangeraangata Sulisitsisuni brancheudvalgi peqataatinneqartariaqarpoq, Nuummi neriniartarfiutillit imerniartarfiutillillu kaammattuipput.
Ulluni makkunani inuit 20-t kisimik neriniartarfinni imerniartarfinnilu isersimaqqusaapput. Tamanna taakkunannga ingerlatsisunut amigartoorutaasarpoq, taakku kissaatigaat pisortat killilersuileraangata peqataatinneqarnerusarnissartik.
- Atugassarititat ilisimanagit toqqissisimananngilluinnarpoq, pingaartumik akiligassat akilerniartillugit imaluunniit ikiorsiissutinik pisinnaatitaaneq ajornareertillugu periarfissaasinnaasunik naatsorsuiniartarnerit eqqarsaatigalugit, Larseeraq Chemnitz Nilak A/S-imi pisortaq, ilaatigut Nuummi Daddyssimik piginnittoq oqarpoq.
Nilak A/S cafeet neriniartarfiit, tassaasut Esmeralda aamma Pascucci, imerniartarfik Kristinemut, Pub Maximut, Pub Nuan, Nuuk Cafe aamma HHE, tamarmik nerisassanik imigassanillu sassaallertartut sinnerlugit allappoq.
Taama isornartorsiuisoqarpoq qanermut assiaqutit aamma inuit katerittarfiini amerlanerpaamik inuit 20-unissaannik Naalakkersuisut nalunaarummik saqqummiussaqareersullu. Killilersuutinut nalunaarut ullumi sivitsorneqarpoq, 30. julip tungaanut atuuttussanngortinneqarallarluni.
Sulitsitsisut peqataatinneqartassasut
Neriniartarfiutillit coronap atuunnerani ilungersunartorsiorsimaqaat, tassa ikiorsiissutinik assigiinngitsunik qinnuteqarsinnaagaluarlutik. Taakkunannga ingerlatsisut kaammatuutigaat, oqartussat inuiaqatigiinnik matusinissamik pilersaaruteqartillutik Sulisitsitsunik peqataatitsisarnissaat.
- Kaammattuutigerusupparput, matusisoqarniartillugu Sulisitsisuni brancheudvalgimit sinniisuutitamik oqaloqateqartoqartarnissaa. Matusisoqarniartillugu paasitinneqartarnissarput uagutsinnut pingaaruteqarlunilu aalajangiisuulluinnartuusarpoq, Larseeraq Chemnitz Egede oqarpoq, nangillunilu,
- Majimi matuneqaratta paasissutissanik amigaateqarsimaqaagut. Silami sassaallersinnaaneq pillugu paasissutissat, pisianik annissassanut allarpassuarnullu atatillugit periarfissat amigaatigisimavavut. Pissutsit tamakku tamaasa misissupallassinnaavavut, taamaalilluta pulaartutsinnut sullitatsinnullu paasissutissiisinnaanerput annertusisinnaagatsigu.
Killilersuutinik naleqqussaaneq
Taakkunannga ingerlatsisut aamma isumaqarput, neriniartarfiit imerniartarfiillu ammatinneqarnerannut peqatigitigillugu killilersuutinik naleqqussaasinnaallutik.
- Ilisimaarilluinnarparput immitsinnut paarinissarput pissutigalugu killilersuilertoqartartoq, tamatumanngalumi malinneqqissaarniarpugut. Ilumoorsinnaanngilarli tamatigut uagut kisitta eqqugaasarnissarput. Sapiiserluta oqaatigissavarput, sullitatsinnik allatuulli isumannaarisinnaalluta, immaqalumi pissutsit tamakkiisumik nakkutigalugit pitsaanerusumik isumannaarisinnaavugut, Laarseeraq Chemnitz Egede nassuiaavoq.
Tamtuma saniatigut taakkunannga ingerlatsisut tupigusuutigaat, Naalakkersuisut sooq isersimasinnaasut amerlassusissaannik killiliisimanerat.
- Sooq uagut immikkut eqqugaasarnerluta aamma sooq isersimasinnaasut 20-unissaannik aalajangiisoqarsimanera pillugu nassuiaanneqarusullutalu oqaloqatigineqarusuppugut . Maajip aallartinnerani maannalumi matusinermut atatillugu suliffitsinnut qanoq ikiorsiinissamik pilersaaruteqarpisi?, Larseeraq Chemnitz Egede aperivoq.
Sermitsiaq.AG Naalakkersuisut Siulittaasuannut aamma Inuussutissarsiornermut Naalakkersuisumut akissutissarsiniarluni saaffiginnissimavoq.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...