Nuummi nakorsaq: Peqqissaavik immikkoortunut arlalinnut aggorneqarli
Nuummi peqqissaaviup innuttaasuni tamakkerlugit nammassinnaajunnaarpai. Innuttaasut nakorsiartarfimmi immikkoortortanut arlalinnut agguarneqartariaqarput, nakorsiat aalajangersimakannersunik nakorsiarfeqartarniassammata, nakorsaq Marie Middelfart isumaqarpoq.
Nuummi peqqissaavimmi ulluinnaat ulapaarfiupput. Innuttaasut 18.000-iutillugit nakorsanut immikkut ilisimasalinnut arfiniliusunut suliassaqartoqartuaannarpoq.
Peqqissaaviulli ataatsip innuttaasut tamaasa nammassinnaajunnaarpai.
Nuummi immikkoortortami nakorsaq Marie Middelfart, Dronning Ingridip Peqqissaaviani nakorsaasoq, taama isumaqarpoq. Peqqissaavik immikkoortunut tallimanut arfinilinnulluunniit agguarneqarnissaa pisariaqartoq taanna isumaqarpoq, nakorsiartut aalajangersimakannersunik nakorsiarfeqartarnissaat anguneqarniassammat.
- Ukiut 17-nit nunatsinni nakorsaareerpunga ukiorpassuillu Nuup peqqissaaviani
nakorsaallunga. Taamaakkaluartoq nakorsiartittakkama amerlanersaat ilisarisimaneq ajorpakka, Marie Middelfart oqaluttuarpoq.
Sermitsiaq.AG-mut allaatigisaqarluni taanna oqaluttuarpoq Nuummi innuttaasut tamavimmik nakorsiarsinnaasut, Nuummi, Nuussuarmi Qinngorpumiluunniit najugaqarneq apeqqutaatinnagu.
Nakorsap nakorsiaq ilisarisimanngippagu, nakorsiap napparsimanermut ersiutini napparsimanermilu oqaluttuassartaa aallaqqaataaniik uterlugu oqaluttuareqqaartariaqartarpaa, tamannalu nappaatip paasiniarneranik aallaqqaataaneerinnermik kinguneqarsinnaasarpoq.
Maluginiaaneruneq
Nakorsat reservelæget aamma peqqissaasut ullumikkut nakorsiartitsinerusarput. Nakorsallu immikkut ilisimasallit aqqutissiuussillutillu siunnersuinerusarlutik. Reservelæget, tassa immikkut ilisimasaqarlutk ilinniakkamik suli naammassinnissimanngitsut, pisariaqartitsineri aallaavigalugit nakorsat immikkut ilisimasallit nakorsiartumik misissueqataasinnaasarput.
Nakorsat immikkut ilisimasallit arfinillit aamma reservelæget aqqaneq-marluk Nuummi peqqissaavimmi maanna atorfeqarput.
- Illoqarfiup immikkoortui aallaavigalugilluunniit nakorsiat nakorsiarfissaat immikkoortinneqarsinnaappata, nakorsiat qanoq pisariaqartitsineri nakorsanit malugiuminarnerulissapput. Taama aaqqiinermi nakorsat allat maani atorfinitsinneqarsinnaapput, Marie Middelfart naliliivoq.
Nakorsat immikkut ilisimasallit amerlanerusut atorfinitsinneqarnissaat taassuma kissaatigaa, immikkoortortaqarfeqalernermi nakorsat ilinniarsimasut sisamat suleqatigiissinnaanissaat takorloorsinnaagamiuk.
- Nakorsaasugut maannakkornit annertunerusumik nakorsiartitsisarusuppugut, nakorsaq oqaluttuarpoq. Taanna nassuiaavoq nakorsat immikkut ilisimasallit namminneerlutik ilaatigut nakorsiartitsisartut, amerlanertigulli siunnersuinerusarlutik.
Immikkoortortaqarfiliornermi suleriutsit kisimik pitsanngussanngillat. Nakorsiat sullinneqarnerat aamma pitsanngorsinnaasorineqarpoq.
- Illoqarfiup immikkoortortaqarfii aallaavigalugit nakorsiartarfeqalersinnaappat nakorsiat ilisarisimanerulersinnaavagut. Tamanna nakorsianut toqqissisimanarnerussaaq, nakorsiallu tatiginerulersinnaavaatigut, taamatullu napparsimanertik inuunertillu pillugu ammanerusumik oqaloqatigisinnaalissalluta, Marie Middelfart nassuiaavoq.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...