Nuummi mittarfiup eqqaani biilinut unittarfiit ikinnerulissasut
Sapaatip akunneri arlaqanngitsut qaangiuppata angalasut qaammatini arfineq-marlunni tulliuttuni mittarfimmut nutaamut qaartiterisoqarneranut atatillugu biilit unittarfiisa ikinnerulernissaat naatsorsuutigissavaat.
Nuummi mittarfiliorneq maannakkut sumiiffimmut, terminalip eqqaani biilit uninngasarfiannut qanittumiittumut, killippoq. Tassani entreprenørip ilaatigut mittarfissamut, aqqusinernut aqqutaasussanut isumannaallisaavimmullu inissaqalersitsiniarluni qaarsoq qaartitertussaavaa.
Kisianni isumannaallisaanermik pissuteqartumik aammalu biilit eqqarsaatigalugit, biilit biilit uninngasarfianni uninngatinneqarneranni suliaqarneq ingerlanneqarsinnaanngilaq.
Taamaattumik suliaqarnerup ingerlanerani biilit uninngasarfiat 1. maj matuneqarallassaaq. Taamaattoq suli terminalip saavanut aatittoqarsinnaassaaq imaluunniit niutittoqarsinnaassalluni, taamatullu tassunga taxat bussilli pisarnertut tikissinnaallutik.
- Angalasussat ilaannut tamanna annertuumik ajoqutaasussaasoq ilisimavarput, tamannalu ajuusaarutigisorujussuuarput. Kisianni ajoraluartumik mittarfissap naammassinissaanut tamanna pisariaqarluinnarpoq, Kalaallit Airportsimi pisortaaneq, Jens Lauridsen oqarpoq.
Biilit angerlarsimaffinniitikkit
Suliaqarnerup ingerlanerani mittarfiup qanitaani sumiiffinni allani suli biilit uninngatinneqarsinnaassapput. Kisianni ajornanngippat biilit angerlarsimaffimmiitiinnarneqassasut allatullu iliorluni mittarfimmukartoqartassasoq, Kalaallit Airportsip kaammattuutigaa.
- Taavani inissaq annikitsuaraavoq. Taamaattumik sumiiffimmi biilinik uninngatitsinngilluinnaruit ajunnginnerpaajuvoq. Ikinnguternut, sanilernut imaluunniit suleqaternut biiliutsigit imaluunniit busserit imaluunniit taxarlutit, Jens Lauridsen oqarpoq, nangillunilu:
- Biilitit sumiiffimmi matuneqartumi tassaniippata, ajornarunnaarniariarnerani nuunneqassasut ilungersorluta qinnuigaatsigit. Tassami taanna sukkasuumik imaarneqarpat, sukkanerusumik aallartissinnaalissagatta suliassallu naammassisinnaassagatsigit.
