Nuummi mittarfiliorneq: Mittarfiup ilassaa siulleq misilittarneqassaaq

Nuummi mittarfissap ilassaa siulleq angallannermut aqutsisoqarfimmit misilittarneqassaaq. Mittarfissaq uuttortarneqassaaq, misileraasoqassaaq upalungaarsimanermullu sungiusartoqassalluni.

Nuummi mittarfissap ilassaa siulleq novembarip aallartinnerani atorneqarsinnaalernissaa Mittarfeqarfinnit Kalaallit Airportsimiillu sulissutigineqarpoq, taanna 930 meterisut takissuseqarpoq.

Maanna sulineq ima killippoq angallannermut aqutsisoqarfik misissuiartortussanngorluni. Angallannermik aqutsisoqarfiup mittarfik sillimaniarnikkut isumannaatsumik inissisimanissaa qulakkiissavaa, taamaasilluni mittarfik miffigineqarsinnaallunilu aallarfiusinnaanissaa aqutsisoqarfimmit akuerineqassalluni. Angallannermut aqutsisoqarfik nittartakkamini allappoq.

Angallannermut aqutsisoqarfiup akuereqqaassavaa mittarfik timmisartunik atorneqarsinnaanersoq.

Uuttortaanerit 200-t sinnerlugit

Inatsisit malillugit mittarfimmik sanaartortoqarnersoq mittarfilerinermik misissuisartut marlunngormat uuttortaanertik aallartippaat.

- Mittarfik 200-t missaariarluni uuttortarneqassaaq. Upalungaarsuinermut sungiusartoqassaaq, aamma sulisut eqqortumik suliassaminnut piareeqqanersut misilittarneqassapput. Mittarfiup qullii eqqortumik ikkussorneqartarnersut, sarfalersuut eqqortumik ikinneqarnersoq kiisalu eqqortumik aserfallatsaaliuisoqarnersoq sulisut misilittarneqassapput, mittarfilerinermut inspektøri Casper Bruun Andersen oqarpoq.

Marlunngornermi upalungaarsuinermut sungiusartoqarpoq.

Ikuallattoqarneranik kalerrisaarutip aallartinneranit minutsit pingasut iluini ikuallattoq qaminneqareersimasussaavoq.

Suliassaq taanna iluatsippaat, kalerrisaarut aallartereersoq Mittarfeqarfiit qatserisartui ikuallattoq minutsini marlunni sekundinilu 30-it qaangiuttoq qamippaat. Angusaq Casper Bruun Andersenimit naammagisimaarneqarpoq.

Sungiusaqatigiinneq naammagisimaarneqarluarpoq

Mittarfiup kujataata tungaaniittumi containeri ikuallattoq qaminneqarpoq.

Angallannermut Aqutsisoqarfik Mittarfeqarfiit Kalaallit Airportsilu suleqatigalugit mittarfissap akuerisaanissaa anguniarlugu qanimut misissuissapput.

Timmisartoq siulleq novembarip pingajuani minnissaa naatsorsuutaavoq. Mittarfik tamaat naammassiguni 2200 meterisut takissuseqassaaq, 2024-milu atuutilernissaa naatsorsuutaavoq.

Powered by Labrador CMS