Nuummi milliardip affaanut sanaartukkat nutaat
Permagreen Grønland A/S aningaasaliissuteqarnermik ingerlatseqatigiiffik Imeqarfik ApS sinnerlugu 237-nik inissialiorpoq.
Ataasinngornermi 13.10 iluarsineqartoq. Siusinnerusukkut allassimavoq, taseq imeqarfiusoq atorunnaarneqarnissaanik Nukissiorfiit pilersaaruteqartut, tamanna eqqortuunngilaq. Nukissiorfiit Nuummi imermik pilersuisneq allanngortinniarlugu periarfissanik misissuisimapput, tatsilli imeqarfiusup atorunnaarsinneqarnissaanik pilersaaruteqartoqanngilaq, taamatummi allannguisoqarneratigut aningaasartuuteqartoqartussaammat, Nukissiorfinnit ilisimatitsissutigineqarpoq.
'Kissarneqqortuunnguaq, qallunaatut Vandsøvej, Nuummi H. J. Rinksvejimit imeqarfimmut atavoq, ukiunilu kingullerni aqqusineq sanaartorfiusorujussuuvoq tassani inissianut nutaanut ungasianit kiassarnermut aqqutit, innaallagissap aqqutai, kuuffiit, erngup aqqutai telekabelillu ikkussorneqarlutik.
Aqquserngup isuani, imeqarfik tikivillugu, entreprenøritut ingerlatsivik Permagreen Grønland A/S qatsissumi salliarnartarujussuup, nalissaqanngitsumik isikkivillip, tungaanut sulinermi aqqusinniorsimavoq 350 meterinik takissusilimmik: Avannamut kangimut Nuussuarmut Sermitsiamullu aputerasaartumut isikkivilimmi, kujammut kimmullu illoqarfiup qeqqanut Akianullu isikkivilimmmi.
– Tamassuma isikkivia nalilerujussuuvoq, illoqarfiup immikkoortuanut tamaanga kommunimut pilersaarummut ilassummi allassimavoq.
Periarfissat nutaarluinnaat
Tamaani, Inussussuarmik atilimmi, aningaasaliissuteqarnermik ingerlatseqatigiiffik Imeqarfik A/S sinnerlugu Perrmagreen 237-nik inissialiorpoq. Inissiat siulliit 2023-mi apriilimi iserterfigineqarsinnaalissapput, kingulliillu 2025-mi aasakkut. Inissiaqarfik nutaaq pinngortitami alianaatsorsuarmi killilimmilu inissisimavoq, tassanngaanniilli timersortarfinnut, ulluunerani paaqqinnittarfinnut klubbinullu, akunnittarfimmut neriniartarfimmullu, eqqumiitsulianik katersugaasivimmut, pisiniarfissuarmut illoqarfiullu qeqqani atuarfittaassamut pisuttariaannaavoq. Inissiaqarfittaassaaq aqqusineeqqakkut qullilersorsimasukkut illoqarfiup immikkoortuanut Qernertunnguanut attaveqassaaq.
Imeqarfiup eqqaa kommunip Nuummi qorsoqarfissamut sukisaarsartarfissatullu pilersaarutaanut pingaaruteqartuuvoq. Kissarneqqoortuunnguup isuata tamarmi ineriartortinnissaanut tunngavissaavoq nukissamik pilersuiffiup Nukissiorfiit pilersaarutigineqartutut imeqarfimmik atuiunnaarnissaa. Akerlianik tamaani najugalinnut tamaanngartartussanullu nutaarluinnarnik periarfissaqalissaaq.
Allaaserineqartoq aviisimi Sermitsiami tamakkiisumik atuaruk. Aviisi uani pisiarineqarsinnaavoq:
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...
