pisinnaatitaaffiit
Nuummi meeqqat maanna immikkut ittumik illersuiseqarsinnaalerput
Isumaginninnermi imminnut tunngasunik suliani, meeqqat inuusuttullu nipaat ersarinnerulissapput. Taama pisoqarsinnaalissaaq meeqqanik illersuillutik ikiuisartussanik suleqatigiinnik Najortimik atsikkamik pilersitsinikkut. Neqeroorut meeqqanut Nuummiittuinnarnut aallaqqaammut atuutissaaq
Isumaginninnikkut suliani immikkut ilinniagaqarsimasumik inersimasumik, meeraq sinnerlugu suliamut oqaaseqarsinnaatitaasussamik, Najortimik, Nuummi meeqqat februarip aqqarnanit ikiorneqarsinnaalissapput.
Meeqqanut inuusuttunullu kommunimut attaveqarusuttunut, kommunilu najugaqartunut tunngatillugu Najorti pilersinneqarpoq.
Nuummi aallartissasoq
Illersuiseqalersitsilluni aaqqiissuteqarneq meeqqat pisinnaatitaaffiinik sullissivik MIO aamma Peqatigiiffik Kalaallit Meerartaat tunuliaqutaralugit pilersinneqarpoq. Nuummilu meeqqat siulliullutik neqeroorummik iluaquteqaqqaartuussapput.
- Najortip pilersinneratigut meeqqanik illersuillutik ikiuisartussanik pilersitsivugut, tassuunakkut suliani imminnut tunngasuni meeqqat peqataatinneqarsinnaalissallutik, meeqqat illersuisuat Aviâja Egede Lynge tusagassiuutinut nalunaarummi erseqqissaavoq.
- Meeqqat amerlavallaat ilisimasanngilaat suliani imminnut tunngasuni susoqartarnersoq, aaliangertakkallu amerlavallaat meeqqat qulaatiinnarlugit aalajangerneqartarput – tamakku Najorteqalerneratigut allanngortinneqassapput, taanna oqarpoq.
Meeqqat akisussaaffiginngikkaat
Meeqqat ilanngunneqarnerat, akisussaaffimmik meeqqamut tunniussinermik isumaqanngilaq.
- Kommunit suliassariujuassavaat aalajangissallugu meeraq angerlarsimaffimmi avataani inissinneqassanersoq. Qanoq pisoqarnissaanut meeraq toqqaasuusanngilaq, aaliangiinissamullu meeraq akisussaasuunngilaq, Peqatigiiffik Kalaallit Meerartaani suliamik ingerlatsisoq David Randa oqarpoq.
- Inummilli Najortimik taasamik peqateqartarnissap siunertaraa suliassanut meeqqanut tunngasunut kommunip pitsaanerusumik aaliangiinissaminut tunngavissiuunneqarnissaa, aaliangikkallu pitsaanerusunik, meeqqap peqataatinneqarneratigut, meeqqamut sunniuteqarnissaa, taanna oqarpoq.
Siammarterneqassasoq
Taamatut illersuiseqartitsinerup siammarterneqarnissaa alloriarnissap tullerissavaa.
- Sapatip akunnerata tulliani Sisimiuliassaagut, inunnik pikkorissunik meeqqanik suleqateqarsinnaasunik ujarleriartorluta. Pilersaarutaavoq meeqqat Maniitsumiittut aamma Sisimiuniittut Najorti-mik neqeroorfigineqarsinnaalissasut 11.april 2016-imiit. Najortimi suleqatigiissussat pingaaruteqarluinnartumik anguniagaqartuussapput. Neriuppungalu piffissap ingerlanerani Najorti nunarput tamakkerlugu suleqatigiiffinngorumaartoq, Aviâja Egede Lynge naggasiivoq.