Nuummi meeqqat inuusuttullu ukiumi nutaami qitittarfittaassasut
NuQi – Nunatta (inuisa) Qiteqatigiiffiat qiternermut takutitsinermullu sungiusartarfiup aappaagu marsip 1-ani timersortarfimmi inissisimatinneqalernissaanik Nuummi Illorsuarmut Timersortarfimmut isumaqatigiissusiorsimavoq.
Qitittarfimmit nutaamit, Nuummi Illorsuarmi Timersortarfimmi inini quleriinni siullermiittussamit, meeqqat tallimaniit 18-inut ukiullit qitinnissamut takutitsinissamullu periarfissaqalersinneqassapput.
Nuummi Illorsuaq Timersortarfimmi 1.Sali sanaqqinneqasaaq, qitittarfissatut tulluarsarneqassalluni, marsillu aallaqqaataani 2023-mi ammarnissaa naatsorsuutigineqarpoq.
Qitittarfik meeqqanut tallimaniit 18-inut ukiullit, pingaartumik niviarsiaqqanut, inissaqartitsissaaq.
- Niviarsiararpassuaqarpoq timersuutinik nalinginnaasunik soorlu arsaannermik soqutigisaqanngitsunik. Niviarsiaqqanillu peqataatitsiniarneq unammillernartuusinnaavoq. Misilittakkavut naapertorlugit qitittartut amerlanerpaartaat niviarsiaraapput, kisianni qitittarfimmi nutaami nukappiaqqat soorunami aamma tikilluaqqusaapput, suliniummi aqutsisoq Ruth Montgomery Sermitsiaq.AG-mut oqarpoq.
Timersuuterpassuit nukappiaqqanut sammisut
Taassuma erseqqissaalluni oqaatigaa, timersuuterpassuit nukappiaqqanuunerusoq sammisuusut, qitittarfillu nutaaq niviarsiaqqanut isumannaatsuullunilu toqqissisimanartuussasoq, taakkununnga sammitinneqassammat. Isiginiarneqartussaq alla tassaavoq meeqqat mikisut timiminnik aalatitsilernissaat qitittalersinnissaallu.
- Timersoqatigiiffinni GIF-imilu meeqqat mikisut sisamanik tallimanik ukiullit qanoq timersortittalersinnaanerivut eqqartorneqartorujussuusarpoq. Isumaqarpunga tamanna soqutiginartuusoq, qitinnerup iluani niviarsiaqqanik nukappiaqqanillu taama ukiulinnik peqataatitsisinnaasssuseqaratta.
NuQi – Nunatta Qiteqatigiiffia Qiajuk Studiosip ukiuni qulini qitinnermik takutitsinermillu misilittagarisaanik tunngaveqarpoq, qitittarfimmik piujuartussamik, innuttaasuniillu pigineqarlunilu ingerlanneqarsinnaalernissaanik periarfissiissalluni, inuit atugarissaarneri apeqqutaatinnagu meeqqanut tamanut iluaqutaassalluni.
- Kulturi kulturikkullu misigisassat soorlu qitinneq, erinarsorneq nipilersornerlu meeqqat inuusuttullu imminnut naleqartinnerinut nukittorsaataasarpoq, taamaattumik meeqqat inuusuttullu nuannarilluagaannik iluaqutigisaannillu timiminnik aalatitsinissaannik qitinnissaannillu periarfississallugit nuannaaruterujussuuvoq, Ruth Montgomery erseqqissaavoq.
Sivisuumik pilersaarutigineqarsimasoq
Kisianni pilersinniarnera ilungersunarsimasoq, NuQi – Nunatta Qiteqatigiiffianni suliniummut aqutsisoq, Ruth Montgomery-Andersen, oqaluttuarpoq.
- Suliniut una ukiunit arfinilinnit amerlanerusuni pilersaarutaareerpoq, sungiusartarfiussallunilu siunissami innuttaasunit ingerlanneqartoq.
NuQip – Nunatta Qiteqatigiiffiata aningaasaliisartut ataavartumik attaveqarfigisassavai, taavalu ilaasortat akiliutaat, aningaasaatikinnernut kommunip tapiissutai, qitinnermillu peqatigiiffiit allat suleqatigineqarnerannit aningaasaqarnikkut imminut napatissinnaalernissaq pilersinneqassasoq neriuutigineqarluni.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...