Nuummi meeqqat illuat ikuallattoq
Meeqqat Illuat Nuummiittoq ataasinngornermi ikuallalersimavoq. Politiit annertuumik ajoqusertoqarsimanngitsoq ilisimatitsissutigaat, innuttaasullu annaassiniarlutik sulisunut akornusiinnginnissaannik qinnuigalugit.
Politiit paasissutissanik nutaanik nassiussivoq allaaserisaq nalunaaqutaq 16.00 nutarterneqarpoq (red.)
Politiit ataasinngornermi nalunaaqutaq 14.13 nalunaarfigineqarput, meeqqat angerlarsimaffiata, Meeqqat Illua (børnehjem) Sanap eqqaaniittup pujoorfianit inneq takuneqarsinnaalersimavoq.
Pigaartut pisortaata Gedion Quistip nalunaaqutaq 14.30 Sermitsiaq.AG-mut ilisimatitsissutigaa, sulisut meeqqallu meeqqat illuannit qimagutsinneqarsimasut.
- Annertuumik ajoqusertoqarsimanersoq pillugu maannakkorpiaq paasissutissaateqanngilagut, pigaartut pisortaat oqarpoq.
Pisortap ilisimatitsissutigaa, qatserisartut politiillu arlallit meeqqat illuanniittut, sulilu qamisaaneq ingerlanneqartoq. Pigaartut pisortaata sulisut eqqissisimatinneqarnissaat piumasaraa.
- Innuttaasut qanillinaveersaarnissaat piumasaraarput, annaassiniarlutik sulisut suliatik eqqissillutik isumaginiassammatikkit, Gedion Kvist oqarpoq.
Ikuallannermut suna pissutaanersoq oqaatigissallugu suli siusippallaarpoq, pigaartut pisortaat oqarpoq.
Qimarngussuineq sivikitsoq ajoqusertoqanngitsorlu
Meeqqat Illuani ikuallattoq ingerlaannaq qaminneqartoq, politiit ataasinngornermi tusagassiuutinut nalunaaruminni paasissutissiissutigaat. Ikuallannerlu illup iluani allanut siaruarsimanngitsoq aamma oqaluttuaraat.
Najugaqartut sulisullu sivikitsumik qimarngunneqareerlutik angerlarsimaffimmut uteqqissinnaalersipapput ajoqusertoqanngilarlu.
Politiit qatserisartullu sivikitsumik Meeqqat Illuaneereerlutik ingerlaqqipput.