Nuummi meeqqanut juulli nuannersoq

Piumassutsiminnik sulisut, klovnip Mikip aamma Juullip Inuata decembarip 24-anni "Meeqqat Juulliat" ingerlappaat, pisarnertut Nuup Katersuartarfiani - ukioq mannalu arfinilissaa ingerlanneqarmat meeqqat 49-t inersimasullu 26-t peqataapput.
Ullaap tungaani peqataasut piumassutsiminnillu sulisut katersuupput ataatsimoorlutillu SANA-mukarput juullip inuata helikopterimik tikinnera takuniarlugu. Ualikkut Hans Egedep Oqaluffiani naalagiaqatigiipput. Katersortarfik ammarpoq nal. 15.00.
Utaqqiisaa qiortaasoqarpoq, Disneys Juleshow isiginnaarneqarluni klovnilu Miki aliikkusersuilluni. Nal. 17.00 Juullip Inua takkuppoq. Taanna meeqqanut tamanut nissiaqqap nasaanik tunioraavoq.
Nerineqarput puulukimineq siataq, savaaqqap neqaa, qeerlutooq, rødkålit, naatsiiat, miseraq kajortitaq soorunamilu ris á la mande.
Nerinerup kingorna orpiliartoqarpoq kalaallit qallunaallu juullimi tussiuaannik atuilluni, naggataatigullu tasiorluni katersortarfik kaajallallugu atorneqarluni ´nu er det jul igen´.
Ilaqutariit tamarmik Katuamut ´ilaqutariinnut atugassanik´ tunineqarput, tassaappullu filmertarfimmut cafe-mullu meeqqanut inersimasunullu isissutissat. Tamatuma saniatigut meeqqat tamarmik marlunnik tunissutisipput, atertillu taaneqaraangat tulluusimaarlutik aasarpaat.
Christina Mølholm aamma Allan Iversen, aaqqissuussinermik ingerlatsisut, oqarput aaqqissuussineq taamaallaat iluatsissinnaasimasoq aningaasaliisoqarnera pissutigalugu.
– Tupinnaannartumik tunissuterpassuit piumassutsiminnilu sulisut pissutigalugit toqqissisimasumik qangatut juullisiortitsisinnaasimavugut tunissutissaqarluni, nerisoqarluni nuannisaqatigiittoqarlunilu.
KK Engros nerisassanik tunisivoq, nerisassallu napparsimasut akunnittarfianni kantinami pisortamit Jens Ligaardimit sananeqarput. Pisiffik ilaatigut orpimmik mamakujuttunillu tunisivoq. Tunissutissat pingaartumik tunniunneqarput Nanu Børn-imit, Helene & Svend Junges Fondimit, kiisalu Lions Club Nuuk-mit.