Nerisassat

Nuummi kalaalimineerniarfiup nutaap siunissaa suli ilisimaneqanngitsoq

Illu kusanartoq Nuummi ukiuni tallimani kalaalimineerniarfiusoq tuniniarneqassasoq, Sermersuumi kommunalbestyrelsip aalajangerpaa. Taartissaanulli pilersaarummik suli piareersimasoqanngilaq

Nuummi kalaalimineerniarfik 'nutaaq' tuniniarneqassaaq

Paatsiveerupput!

2010-mi kalaalimineerniarfitoqaq nutaamik taarserneqarpoq. Maannakkulli kalaalimineerniarfik 'nutaaq' tunineqartussanngorpoq pisoqarlu millionilikkaat atorlugit nutarterneqassalluni.

Aaqqiiniarnissaq qangali eqqarsaatigineqartoq
Ukiut ingerlanerini kalaalimineerniarfik nutaaq kommunip aningaasaqarneranut artukkersuutaavoq. Tuniniavik illoqarfiup qeqqani Brugsenip saniani ukiut tallimat matuma siorna ammarneqarmat annertuumik isumalluarfigineqarsimagaluarpoq, ingerlanneranili aningaasartuutit isertitarisanit matussuserneqarsinnaasarsimanngillat.

Naatsorsuutitigut amigartoortumik ingerlasoqarneratigut naalakkersuinermik suliallit allatut (akikinnerusumik) aaqqiiniarnissaq qangalili eqqarsaatigisarsimavaat, maannakkullu kommunalbestyrelsemi sanaartornermut ataatsimiititaliami ilaasortat ingerlatsivik suleqatigalugu aaqqiissutissamik nassaarsimapput:

Atuaruk: Sermersuup kalaalimineerniarfik nutaaq tuniniarniarpaa

- Eqqarsaataavoq kalaalimineerniarfiit marluk (illoqarfiup qeqqaniittoq Nuutoqqamiittorlu, aaqq.) siunissami kalaalimineerniarfitoqqamut kattunneqassasut. Tamanna kalaalimineerniarfimmik atuisunut pitsaanerusumik kiffartuussinermik kinguneqassaaq kommunilu ingerlatsinermut aningaasartuutikinnerussalluni, sanaartornermut ataatsimiititaliap kingullermik ataatsimiinnerani imaqarniliami allassimavoq.

Siunissaa nalunartoq
Ataatsimiititaliami siulittaasup Mille Søvndahl Pedersenip (IA) pilersaarut AG-mut tunngavilersorpaa.

- Maannakkutut ingerlanneqarnera illersorneqarsinnaanngilaq. Kommunimut akisuallaaqaaq. Taamaattumik kalaalimineerniarfiup nutaap tuninissaa pisoqqallu nutarternissaa tapersersorpara.

Atuaruk: Nuummi utoqqaat kalaalimineerniarfik ajoraat

Nutaamimi sulisut qanoq pineqassappat?

- Oqaatigissallugu siusippallaarpoq. Pisoqarmi ingerlateqqinneqaleruni aamma sulisoqartussavoq, oqarpoq.

Powered by Labrador CMS