Nuummi januarip aallaqqaataani puiaasanik immikkoortitsineq aallartissaaq

Containerit igalaaminernut, pappiaqqanut, nerisassanut, saviminernut aamma eqqakkanut nalinginnaasunut immikkoortut. Tassaapput Nuummi aamma Kapisilinni innuttaasut siunissami atulissagaat, tamanna kommunalbestyrelsimit aalajangerneqaqqammerpoq.

Maanna illoqarfiit pingaarnersaannut piffissanngorpoq ullormut eqqakkanik immikkoortitsisalernissaq - Qeqqata Kommuniani ukiuni arlalinngortuni iliuuserineqartareersoq, aammnalu Kommuneqarfik Sermersuup Paamiuni misilittariigaa.

Atuaruk: Sermersuumi eqqaaveqarnerulissaaq

Kisianni eqqakkanik immikkoortitsineq kommunip siullermeerluni innuttaasunut piumasaqaatiginianngikkallarpaa, ingerlatsinermut pisortaq, Frank Rasmussen oqaluttuarpoq.

Sermersuumi Paamiut siulliusoq
- Paamiuni ingerlatsinerput aallaavigalugu, ukioq nutaaminngaanniit immikkoortuni annerusuni sisamani immikkoortitsisalerniarpugut. Suliffeqarfinni imaluunniit neriniartarfinni aallartissaagut. Eqqakkat igalaamernit, pappilissat aamma nerisassat immikkoortiterneqassapput. Kiisalu saviminernik eqqakkanik tigusisassaagut, Sermitsiaq.AG-mut oqaluttuarpoq.

Najugaqarfiimmi?
- Suliffeqarfiit aamma igaffeqarferujussuit aallaqqaasiutigissavagut. Kingusinnerusukkut najugaqatigiiffiit oqaloqatigissavagut. Iluatsitsinerit ataasiakkaarniarpagut. Kisianni qularnanngilaq najugaqatigiiffiit nammineq pigineqartut ilanngukkumaartut, Frank Rasmussen neriorsuivoq.

Illoqarfik tamarmi atueqqinnermut tassunga ataatsikkut aallartitsigunik ajornannginnerussannginnami?
- Ilumut, taanna isumaq paasisinnaavara. Kisianni eqqakkanik immikkoortitsinani ileqquusoq suli sungiusimaneqarpallaarami, inuit sungiussipallannissaat ajornassaaq.

Atuaruk: Napasumi eqqakkat qaleriiaatiinnaleqqasut

- Ikaarsaariarneq silatusaarluta pisariaqarparput. Tassami pitsassuarmik maani Nuummi kiassaasinnasumik ikuallaaveqarpugut. Suna tamarmi immikkoortinneqalissappat, taava eqqakkanik ikuallaavimmi ikuallattakkagut amigalissagaluarput, ikuallatassat amerlanngingaarmata.

Eqqakkanit isertitaqanngitsut
Illoqarfiit pingaarnersaat kommunillu sinnera siunissami eqqakkanik immikkoortitanik Danmarkimut allamulluunniit akiliisitsilluni nassiussisoqartalersinnaanera, Sermersuup ingerlatsinermut pisortaata oqaatigaa.

Akikinnerali ajoqutaavoq, nassiussinerullu akisoorujussuunera. Taamaattumik aningaasat eqqarsaatigalugit kajumminnarpallaanngilaq - avatangiisimut kisimi.

Ukiumi nutaami eqqaaviit cintainerit iliorarneqassapput, siullermilli suliffeqarfiit aammalu neriniartarfiit eqqanni kisimi.

Atuaruk: Saliigit 500'nik akissarsitinneqassaatit taava