Nuummi isertitsivik matoqqasoq pillugu Netflixikkut piviusulersaarut
Netflixip nangeqattaartuliaa nuannarineqaqisoq 'Inside The World's Toughest Prisons' ilaatigut Nuummi pisimasoq tunngavigalugu tallimassaannik aallakaatinneqassaaq. Isertitsivik matoqqasoq nunarsuarmi parnaarussiviit akornanni inuppalaarnersaavoq, Raphael Rowe piviusulersaarummik suliaqarniarluni isertitsivimmi matoqqasumiissimasoq oqarpoq.
Tuluit piviusulersaarutinik filmiliortartui Nuummi isertitsivimmi nutaami filmiliornissamut akuerineqarsimapput, nangeqattaartuliamilu Inside The World's Toughest Prisons-imi isertitsivimmi susoqartarnersoq malinnaaffigineqarsinnaassalluni.
Netflixip nangeqattaartuliaani 'Inside the World's Toughest Prisons'-imi nunarsuarmi parnaarussiviit ulorianarnerpaat aallakaatinneqaqattaarput.
Tusagassiortoq Raphael Rowe, toqutsisimasutut pisuussuteqarani ukiuni aqqaneq-marlunni parnaarussaaqqasimasoq, piviusulersaarummi Nuummi isertitsivimmiisinneqarpoq, tassani parnaarussat sapaatip akunnerani ataatsimi peqatigai.
- Parnaarussiviit inuppalaanerpaaffiisa ilaanniissimavunga, Raphael Rowe Sermitsiaq.AG-mut oqarpoq. Piviusulersaarummi suliariniarlugu siorna novembarip qaammataani Nuummiissimavoq. Tassani isertitsivimmut matoqqasumut kalaallit inissinneqarsimasut naapissimavai.
Inissinneqarsimasut uukapaatitsiniartartut
Nunani assigiinngitsuni parnaarussiviit matoqqasut pulaarsimasai allat assigalugit unammilligassaqartoqarpoq.
- Soqutiginarnerpaatut maluginiarsimasara tassaavoq isertitsivimmi nakkutilliisut inissinneqarsimasullu imminnut sunniiveqatigiittarnerat. Maluginiarsimavara, isertitsivinni nakkutilliisut isertitsivimmi qanoq sulisoqartarnissaanik suli paasisaqarusuttartut. Taamaammat inissinneqarsimasut killissaminnik ujaasisarput. Inissinneqarsimasut nakkutilliisunik uukapaatitsiniartarput, tamannalu soqutiginarluinnartuusoq isumaqarpunga, taanna erseqqissaavoq.
Isertitsivimmi ineeqqani hahsimik aamma pujortartoqartarpoq.
- Isertunngivillutik pujortartarput, isertitsivimmilu pujortartoqartarnera tupaallaatiginngilara. Parnaarussiviit ajornerusutu isersimaffigisarsimavakka, taakkunani parnaarussat kokainimik naamaartarput, heroinimik aangajaarniutinilluunniit sakkortunerusunik pisarlutik. Nunani allani parnaarussat "hashiinnarmik pujortartartuuppata" eqqissisimasoqarnerussagaluarpoq, Raphael Rowe oqarpoq.
Suliaq nersualaaraa
Kalaallit Nunaata nunami isertitsivimmi matoqqasumi siullermi inissinneqarsimasunik isumaginnittarnera nersualaarpaa.
- Nunaniissimavunga Kalaallit Nunaannit pisuujunerujussuarni, taakku suliaat ajornerupput. Kalaallit Nunaat eqqortumik iliuuseqartarpoq. Parnaarussiviit pinerluuteqarsimasut nalinginnaasumik inooqqilersinniarlugit suliniuteqarneq ajortut isersimaffigisarsimavakka, parnaarussat taamaalillutik inuunertik allanngortinnagu parnaarussivinnit anisarput. Kalaallit Nunaanni sulissutigineqartarpoq, inissinneqarsimasut inuiaqatigiinni akooqqilernissamut sakkussanik tunineqartarnissaat. Taamaammat nuna inissinneqarsimasut atugaannik sulissuteqartoq nersorneqartariaqarpoq, taanna oqarpoq.
Allannguinissamulli suli inissaqarpoq.
- Isertitsivimmiikkami inissinneqarsimasunik nakkutilliisussat amigaatigineqarput, nakkutilliisullu inissinneqarsimasunik attaveqarnissamut tunngatillugu ilinniagaqarsimanerat amigarluni. Isumaqarpunga, inissinneqarsimasunik nakkutilliisut isertisivimmi sulinissamut piariivissimanngitsut. Takuneqarsinnaavoq inissinneqarsimasunut qanoq pissusilersornissartik nalornissutigigaat, taanna oqarpoq.
Nunarsuarmi sumiiffinnut allanut sanilliullugu Nuummi allaanerusoq alla tassaaqvoq isumannaatsuuneq. Raphael Rowe inissinneqarsimasut akornanniikkami ulorianartorsiortutut misigisimanngilaq.
- Inissinneqarsimasut pissusilersuutaat avatangiisinit sunnerneqarsimalluartarput. Ilaatigut Paraguayimi parnaarussivimmiissimavunga, tassani parnaarussat amerlanersaat savimmik nassataqartuaannarput, aanngajaarniutit assigiinngitsut atugaasupilussuunerat pissutigalugu. Nuummi pissutsit allaanerulluinnarput, tamatumunngalu pissutaavoq suliassat eqqortut isumagineqartarnerat, Raphael Rowe oqarpoq.
Aallakaatitassiami nunani allani parnaarussivinnut allanut sanilliullugu isertitsivimmi qanoq inuppalaartoqartiginersoq paasissutissiissutigineqassaaq. Apeqqullu pingaarutilik apeqqutigineqassalluni: Pinerluuteqarsimasut isertitsivinni nakkutilliisunik nalunngeriikkaminnik aqutsisinnaappat?
Femte sæson af 'Inside The World's Toughest Prisons'-ip tallimassaanik aallakaatinneqarnera Netflixikkut januaarip arfineq-pingajuanni isiginnaarneqarsinnaavoq.
Piviusulersaarut uani takusinnaavat: