Nuummi inuusuttut unnuami ornittagaqalerput

Inuusuttut arlalikkuutaarlutik piffissami sivisuumi inersimasunit nakkutigineqaratik Nuup illoqarfiata qeqqani Pisiffiup eqqaani unnukkut unnuakkullu tarfisarnerat, maanna Kommuneqarfik Sermersuup qisuariaateqarfigaa. Nuuk TV-p ilanngutassiani arlalinni inuusuttut unnuakkut nammineertinneqartartut samminerisa kingorna qisuariartoqarpoq.

- Inuusuttut arlalikkuutaat kommunip tungaanit attaviginissaanut pikkoriffigivallaarsimanngisatsinnik peqarpoq, Helene Broberg Berthelsen, Meeqqanut, Ilaqutariinnut Atuarfeqarnermullu Ingerlatsivimmi pisortaq oqarpoq.

Nerisitsineq unnuisitsinerlu
Ullumikkut atuutilersumik inuusuttut ornittagaa NUIF unnuaq naallugu ammasalissaaq. Inuusuttut tassani nerisinnaapput, pisariaqassappallu unnuisinnaassallutik.

Tamatuma saniatigut kommuni isumaginninnermi pigaartunik unnuami angalaartitsisalissaaaq, taakku inuusuttunut attaveqartassapput inuttut atugaat pillugit oqaloqatiginiarlugit aammalu ajornartorsiutaannik aaqqiinissaq siunertaralugu.

- Maannakkut inuusuttut inersimasunit nakkutigineqaratik unnuakkut tarfisartunut inuusuttut peqatigalugit pitsaanerusunik neqeroorfiginissaannut suliniutivut annertusarpavut assagullu isaallugit, Helene Broberg Berthelsen oqarpoq.

Siumumit isornartorsiuineq
Kommuneqarfik Sermersooq taamatut aaqqiissueqarnermini politikerit akuliunnissaannut sioqqutilaarpoq.

Ataatsimut tusagassiuutinut nalunaarummi Siumup Inatsisartuni Ilaqutariinnermut Peqqissutsimullu Ataatsimiititaliaani ilaasortaatitai, Lauara Táunâjik aamma Jess Svane, akuliunnissaminnut piareersimallutik allapput.

- Siumumiit nalorninata oqariartuutigissavarput pissutsit ajuissut aaqqiiviginiarneqartariaqartut kom-munimit naammassineqarsinnaanngippata qitiusumiit akisussaaffiup naammassiniarneqarnissaata ti-guneqartariaqalernissaannik aalajangeeqataanissaq tunuarsimaarfiginaviannginnatsigu, tusagassiuutinut nalunaarummi allaqqavoq.

NUIF nalunaaqutaq 18.00-mit nalunaaqutaq 07.00 tungaanut ammasassaaq.