Nuummi innuttaasut: Sanngiitsut utoqqaallu ikiorsigit
Angerlarsimaffiit ilaanni qiianarpoq ilaasalu imermik kuuginnartumik amigaateqarput. Sivisuumik qamittooqattaarnerit tujorminartutut aarlerinartutullu innuttaasut misigaat.
Utoqqaat sanngiitsullu ikiorserneqarluartut nuummiut neriuutigaat. Anorersuarmi aamma maanna aallartisaleruttorpoq.
Maanna illoqarfiup pingaarnersaani siallerlunilu anorlerpoq. Kallerup innera sumiiffinni assigiinngitsuni suli ikinngilaq. Kallerup innera ataasinngornermi aqqarngup missaanili qamittaqattaalerpoq. Maanna sumiiffinni assigiinngitsuni innaallagiaqarpoq allanilu suli innaallagiaqarani. Nukissiorfiillu kallerup innerata qameqqinnissaa naatsorsuutigaat Utoqqarmiut Kangerluarsunnguaniit kaabili ajoquteqarnera anorersuarnissaalu pissutigalugit.
Ilaqutariit Lyngekkut sivisuumik qamittooqqaneq puigunaatsutut misigisaqarfigaat.
- Tujorminaq qiianaq. Imeqaannarpugut qujanartumik, kisianni kissartoqanngilaq. Meeqqagut massakkut aappallakkigut anerersuup takkutinnginnerani, Kornilie Lynge oqarpoq.
Anorersuarnissaa DMI-p ullumi pingasunngornermi ilimasaarutigaa. Innaallagiap qamittoornerani oqartussat pitsaanerusumik piareersimasinnaagaluartut Morten Larsen isumaqarpoq.
- Taamatut pisoqartillugu ajuusaarnartuaannarpoq, kisianni qanoq iliuuseqarsinnaanngilagut. Oqarasuaatit ajortikkaangata inunnut allanut attaveqarnissaq ilungersunarsisarpoq. Oqartussat pitsaanerusumik piareersimasussaasut isumaqarpunga, tassami siullermeerluni qamittoortoqanngilaq, Morten Larsen oqarpoq.
Misiliineq
Innuttaasut 30-it missaaniittut Brugsenip silataanni utaqqipput. Utaqqisut ilai niuerniartussaapput ilaallu akiligassaminnik akiliiartorluik.
- Akiligassakka akilersinnaannginnakkit neriullunga erninnaaq ikeqqiliivilluta Brugsenip eqqaani utaqqivunga. Neriuppunga innaallagiaq ikeqqiliivissoq, meeqqat assut eqqarsaatigivakka. Ingammik miluffittortut. Angajoqqaami aatsaat kissaaqaarlutik meeqqaminnut milutitsisinnaasarput, Nuka Løvstrøm oqarpoq.
Utoqqaat sanngiitsullu ikiorsigit
Agathe Petersen Ilisimatusarfiup eqqaani najugaqarpoq. Taanna 20 tiimit innaallagiaqarsimanngilaq naapinneranilu Brugsenimut niuerniariarniarluni eqqaani aamma utaqqivoq.
- Innaallagiaq maqaasivara paasiinnartaraarpullu innaallagiamik atuineq qanoq pilluarnartartiginersoq. Qullerparpassuarnik assigiinngitsunik iluaqutaasinnaasullu allat atorsinnaasarpagut, Agathe Petersen oqarpoq nangillunilu:
- Utoqqaat sanngiitsullu ikiortariallit eqqarsaatigeqaakka. Neriuppunga ikiorserneqartut najorneqartullu. Qujamasuutigeqaara Sana namminneerluni innaallagiaqarsinnaammat, taanna qujamasuutigeqaara, Agathe Petersen oqarpoq.
Utoqqarnut sanngiitsunullu qanigisallit immikkut taakkununnga malinnaanissaat Kommuneqarfik Sermersuumit Peqqinnissaqarfimmiillu piumaffigineqarput. Innuttaasut ajornartoornermi kommunimut ornigussinnaapput imaluunniit +299 367281-imut sianerlutik saaffiginnissinnaapput.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...