Skip to main content

Nuummi innuttaasut amerliartuinnavissut

Illoqarfiit pingaarnersaanni innuttaasut - corona nunarsuarmi tuniluukkaluartoq - ukiup ataatsiip ingerlanerani 475-inik amerleriarsimapput, sukkasuupilluarmillu 19.000-it angungajalerlugit.

Nuummi innuttaasut februaarip sisamaani 18.803-nngorsimapput, ukiup siuliani piffissamut tassunga sanilliullugu 2,6 procentimik amerleriarsimallutik.

Kommuneqarfik Sermersuumi borgmesterip Charlotte Ludvigsenip, coronamut atatillugu killilersuinerit inuit amerliartornissaannik killiissasutut isumaqarsimasup taamatut amerleriarsimatiginerat tupaallaatigaa.

- Siorna martsip qaammataani tikittoqarsinnaaneranut inerteqquteqartoqaraluartoq Nuummi innuttaasut amerlanerulersimapput, borgmesteri manna iluatsillugu kommunimut qineqqusaarnermi sammineqarnerpaasoq: innuttaasunut nutaarpassuarnut inissanik qanoq pissisoqarsinnaava? pillugu ilanngussisoq oqarpoq.

Sukkanerusumik inissialiortitertoqartariaqartoq

Charlotte Ludvigsenip erseqqissaatigaa innuttaasut amerliartornerisa malitsigisaannik ”suli sukkanerusumik inissialiortiternissaq pisariaqartoq”.

- 2016-imiit 2019-imut pisortat inissiaataannik nutaanik 500-nik pissarsisimavugut, 2020-mili Namminersorlutik Oqartussat inissianik amerlanerusunik pissarsisinnaanerput unitsippaat. Tamanna ajornartorsiutaavoq. Ukiut 15-it matuma siornatigut Nuummi ilaqutariinnut illunik ikittunnguaanik sanasoqartarsimaneratut pissutsinut uterteqqinneqassagutta, isumaginninnikkut ajutoorujussuassaagut, IA sinnerlugu borgmesteri kommunip ineqarnikkut politikkia pillugu Siumumit borgmesterinngorniartumik Inga Dora Markussenimik oqqassuteqarsimasoq oqarpoq.

Nunamut tamarmut iluaqutaassasoq

Borgmesterimit innuttaasut amerliartuinnarnerat nuannaarutigineqarpoq, sulisussanik amigaateqartoqarnera pissutigalugu aamma innuttaasut amerliartornerisigut pisortat namminersorlutillu inuussutissarsiuteqartut akileraarutitigut isertitaqarnerulersitsisussaammata illoqarfimmilu pisiniarfiit niueruteqarnerulersussaammata.

- Suliffeqarfiit sulisussanik pisariaqartitsipput, Kalaallillu Nunaanni pisortat atugarissaartuunitta ineriartortinneqarnissaanut akissaqassagunik akileraarutitigut isertitaqarnissaq pisariaqartippaat. Taamaammat Nuummi innuttaasut amerliartornerat nunamut tamarmut nutaarsiassatsialaavoq, Charlotte Ludvigsen oqarpoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

Seneste Ugeavis

SENESTE NUUK - NYHEDER