Nuummi innuttaasoq 19.000-i nalliuttorsiutigineqartoq
Illoqarfiit pingaarnersaanni innuttaasut 19.000-it qaangerpaat. Brugsenip silataani nipilersortoqarlunilu kakaomillu sassaalliisoqarnerani Kommuneqarfik Sermersooq malunnartitsivoq.
Nuummi Brugsenip silataani ullaap tungaa nillataalaartumi innuttaasut amerlisimanerat nalliuttorsiutigineqarpoq. Nunatsinni illoqarfiup pingaarnersaanni innuttaasut 19.000-it qaangerpaat, tamannalu Sermersuumi borgmesterimiit, Charlotte Ludvigsenimiit nuannaarutigineqarpoq:
- Ineriartorneq tamanna pitsaasuuvoq. Nuuk alliartorpoq, innuttaasullu amerliartortut tamaanga nuuttarput, sulisariaqarnitsinnik takussutissiimmat suli amerlanerusunik inissialiortitertariaqarpugut, ilinniarfeqarfiit nukittorsassavagut, inuussutissarsiorfiit inerititaqarnerulersillugit, aalisarnermik inuussutissarsiornerup iluani qitiusumik inissisimanerput nukittorsarneqassaaq, takornariaqarnerlu ineriartortitsiffiussalluni.
- Nuuk illoqarfittut anginerusutut nukittunerusutullu aamma 2030-mi 30.000-inik innuttaqartussatut ineriartortinnissaa siunertaavoq, Charlotte Ludvigsen (IA) oqarpoq.
Kaaleeraq M. Andersen nipilersukkanik arlalinnik appisimaarput kakaomillu sassaalliisoqarluni.
Inissiat akiisa qaffakkaluttuinnaraluartut innuttaasut illoqarfiup pingaarnersaanut nuunnissartik aalajangiuttarpaat. Tamanna sanaartortunut ingerlalluartitsivoq.
Inissiat amerlasuut annertuullu maanna sanaatorneqaleruttorput, soorlu Permagreen Kalaallit Nunaat A/S-ip inissiat 237-it Kissarneqqortuunnguani sanaartuleraat. Siorarsiorfiup tungaanut inissiat sanaartorneqaleruttorput, atuarfissaq meeqqeriviillu aamma sanaartorneqaleruttorlutik.
Innuttaasut tamarmik Nuup ineriartorneranut peqataasut borgmesterip Charlotte Ludvigsenip erseqqissaatigaa.
-Maani innuttaasut tamarmik pingaaruteqarput, meeraagunik, inuusuttuugunik, inersimasuugunik utoqqaagunillu. Tassami innuttaasut tamarmik immikkut Nuuk ilusilersueqataaffigaat. Innuttaasut tamarmik Nuuk immikkuullarissunngorteqataaffigivaat, nuannersumillu inuuffigineqarsinnaasunngortinneranut peqataallutik, Charlotte Ludvigsen oqarpoq.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...