Nuummi inissiat akii qaffariarujussuartut
Grønlandsbanken nunatsinni illoqarfiit pingaarnersaanni inissiat akiisa naapertuutinngitsumik qaffariarujussuarsimanerannik takusaqarsinnaannginnerarpoq, kisiannili inissianik niuerfimmi ineriartorneq qanimut malittaralugu
Nuummi piffissami sivisujaami ukiunik arfineq-pingasuniit qulinut sivisussuseqartumi inissiat nammineq pigisat akiisa akunnattumik qaffakkiartornerat misigineqarpoq, taavali akit qaffakkiartupiluulerlutik.
Grønlandsbanken naliliivoq, 2018-imit 2019-imut akit agguaqatigiissillugu 10 procentit missaannik qaffassimasut, tamatumanilu inissiat ilaat, pingaartumik mikinerit, allanit qaffariaateqarnerusimallutik.
Akit qaffariarnerat Nuummi inissianik niuerfimmi malunnaateqarluartumik ineriartorneq peqatigalugit pisimapput. Inissianik piginnittut namminersortut amerliartorput, aamma inissianik arlaqarnerusunik sanaartortoqarlunilu niuerutiginnittoqartalersimavoq. Aningaaseriviullu ukiuni aggersuni aamma naatsorsuutigaa, aningaasaliisartut namminersortut arlaqarnerusut inissialiortiternernik aallartitsiumaartut. Tamatuma peqatigisaanik illut tunineqarsimasut 2018-imi 180-iupput 2019-imilu 159-iullutik, taamaammat aningaaseriviup akit qaffasissusaannik naliliinera patajaatsumik tunngaveqarpoq.
– Nuummi inissiat akii sooq tassanngaannaq ukiup ataatsip ingerlanerani taama qaffassimatigaat?
– Erniat appasissut, sanaartornermi atortussat tikisinneqartartut akiisa sanaartornerullu nalinginnaasup akiata qaffasinnerunerat illunillu piserusunnerup qaffakkiartornera akinik qaffasinnerulersitsillutik tatisisimapput. Tamanna inissiat nutaat pisoqqallu akiinut sunniuteqarpoq, aningaaseriviup pisortaa Martin Kviesgaard Sermitsiamut oqarpoq.
Niuerfimmi killilersugaanngitsumi tuniniakkat pisiariumaneqartullu akinik aalajangiisuusarput, Nuummilu innuttaasut amerliartortuarlutik. Kommuneqarfik Sermersuup 2030-mi innuttaasut 30.000-inik amerlassuseqalersimanissaanik anguniagaa qaffasissoq immaqa anguneqassanngikkaluartoq innuttaasut amerliartornerannit inissianik niuerfik tatineqareersimasoq suli tatineqarnerulersimavoq.
Tamatuma peqatigisaanik Kalaallit Nunaat ukiuni kingullerni aningaasarsiornikkut qaffakkiartuaarnermik misigisaqarsimavoq, tamatumalu peqatigisaanik mittarfiliortiternernut aningaasaliinissat annertuut ilimanaateqarnerat peqatigalugu inuiaqatigiinni isumalluarnermik pilersitsisimalluni, tamannalu namminerisamik initaarusunnermik annerulersitsisimalluni.
Allaaserineqartoq aviisimi Sermitsiami atuaruk. Aviisi uani pisiarineqarsinnaavoq:
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...
