Sermersooq
Nuummi inissialiortitsinissaq sipaaruteqarfiuvoq
Inissialiornissamut atatillugu aningaasartuutigineqartut assigaa soorlu ineqartunut inissialiorluni
Nuummi Tuujummi inissialiornissamut atatillugu Kommuneqarfik Sermersooq 33 million koruuninik sipaaruteqarpoq. Tassani marlunnik sanaartortoqarnissaa siunnerfigineqaraluartoq pingasunik sanaartortoqalerpoq.
Tamanna MT Højgaardimik isumaqateqareernermi kingorna saqqummiunneqarpoq.
Borgmesterip naammagisimaarpaa
- Pilersaarutaasumit sukkanerusumik Nuummi inissaaleqineq iliuuseqarfigileratsigu nuanneqaaq, Kommuneqarfik Sermersuumi borgmesteri, Asii Chemnitz Narup, Inuit Ataqatigiit, oqaaseqaateqarpoq.
Ukiumoortumut missingersuutini Tuujummi blokkit marluk immikkut 46-nik initallit aningaasaliiffigineqarput, kingusinnerusukkullu blokkip pingajua sananeqartussatut pilersaarutaalluni. Pilersaarusiornerup nalaani blokkit pingasut ataatsikkut sananeranni annertuumik sipaaruteqartoqarsinnaasoq paasineqarpoq.
Taamaattumik ukioq manna sanaartorneq tamakkiisoq aallartinneqarsinnaaniassammat, Kommunalbestyrelsip aningaasaleeqqinnissaq akuersissutigaa.
Blokkit pingasut ataatsikkut sananeqarneratigut katillugit 33 millionit koruunit sipaarutigineqassapput. Taakkulu aningaasat kollegiamik ataatsimik naleqarput, kommuni ilisimatitsivoq.