Nuummi håndboldernermik aaqqissuussaq annertooq

Kalaallit Nunaanni Assammik Arsartartut Kattuffiat kingullermik De Panamerikanske Mesterskabit Nuummi aaqqissuukkumagaluaramikkit iluatsinngilaat. Maannli iluatsissasoq oqariartuutigineqarpoq.

Suleqatigiissitanik assigiinngitsunik pilersitsisoqassaaq. Ukiut marluk affaanillu piffissaqarluni assigiinngitsut suliassat aamma aningaasaliissutit naammassineqarnissaat naammassangatinneqarpoq.

Sungiusaasoq neriulluartoq
Assammik arsartartut nunanut allanut sungiusaasuat Niels Møller, Sermitsiaq.AG-mik oqaloqateqarnermini isertuutinngilaa De Panamerikanske Mesterskabit Nuummi aaqqissuunneqassappat annertussasoq.

- Nuummut tikeraartut 300-400 missaani. Assammik arsartartartut pitsaanerpaat, nunanit assammik arsarnerup tungaatigut nukittuuneersut, soorlu Argentina, Brasilia, Cuba aamma Chile. Kalaallit unammisartuit unammerusussullit. Timersortarfik ulikkaaqqasoq. 2019-mi silarsuarmi pissartanngorniunnermut peqataanissamut inissat pingasut unammissutigineqarneranni unamminerit pissanganarluinnartut.

Nangipporlu:

- Nunarsuarmi pissartanngorniunneq Danmarkip Tysklandillu suleqatigiinnerisigut aaqqissuunneqartoq. Pissartanngorniunneq immaqa Kalaallit Nunaannit peqataaffigineqartoq. Naak anngunniunneq oqitsuinnaanavianngikkaluartoq periarfissaqarluarpoq, Niels Møller naqissusiivoq.

Nunarput pingasoriarluni ilaanikuuvoq
Ajugaasut pingajuattut inissinniarsarisoqassaaq. Tamaanna Kalaallit Nunaata pingasoriarluni misilereerpaa. Anngunniunnerit kingulliit pingasut Chile pingajuulluni annguttarpoq. Ajugaajuartut, tassa Argentina aamma Brasilia allanngortinneqassappata pisoqangaatsiaqqaartariaqarpoq.

Kalaallit Nunaanni Assammik Arsartartut Kattuffiat Timersoqatigiiffiit Kattuffiannit aamma Elite Sport Greenlandimit tapersersorneqarpoq, minnerunngitsumillu nunat tamalaat håndboldertartut kattuffissuannit.