Nuummi Eqqumiitsulianik Saqqummersitsivik nalliuttorsiorniartoq
Nuummi Eqqumiitsulianik Saqqummesitsivik tallimanngorpat ukiunik 15-inngortorsiussaaq, tamannalu nalliuttorsiutigineqassaaq akeqanngitsumik takuniarneqarsinnaasumik plakatinillu agguaassisoqassalluni.
Nuummi Eqqumiitsulianik Saqqummesitsivik nalliuttorsiornermi saniatigut aamma ukioq manna katersugaasivittut akuerisatut atuutilerpoq.
- Erfalasulerluta, plakatinik akeqanngitsunik agguaasiniarluta unammisitsiniarlutalu Nuummiunik qaaqqusivugut, katersugaasivik tusagassiorfinnut nalunaaruteqarnermi allappoq.
Ulloq 22. maj 2005, katersugaasip siullermeerluni matuni ammarapai – taamanikkut namminersorutut katersugaasivittut, Svend Junngemit Helene Junge Pedersenimillu pigineqarluni.
Ukioq ataaseq qaangiummat ilaqutariit katersugaavik Nuup Kommunianut Nuummilu innuttaasunut tunniuppaat:
Katersarpassuarnut tunngaviusoq
- Katersugaasiviup katersugaatai ullumikkut 1300-t missaannik amerlassuseqarput, taakkunannga 1000-it 2006-imi tunissutinut ilaapput. Ilaqutariit Jungekkut nutaartaa, saqqummersitsivik, aamma tunniuppaat. Ajoraluartumik Svend Jungep toqunerata kingorna 2007-imi aatsaat atoqqaarfissiorneqarsimavoq. Saqqummersitsivittaa Kalaallit Nunaanni kisiartaalluni eqqumiitsulianik saqqummersitsivittut sananeqarsimasutuaavoq, katersugaasivik allappoq.
Katersugaasiviup pisortaata Nivi Christensenip oqaluttuaraa, ilaqutariit Junngikkut tunissutaat ullutsinni eqqumiitsulianik katersani Kalaallit Nunaannut attuumassutilinni annerpaajugunartumut tunngaviliisimasoq:
- Ilaqutariit Jungekkut taamatut katersugaasiviliornerat nukeqassutsimik takutitsineruvoq. Tamanna eqqumiitsuliornerup silarsuaani sinaakkusiisimavoq, eqqumiitsuliorneq pingaarnerpaatut inissinneqarluni. Katersugaasivimmik pilersitsineq inuiaqatigiinni eqqumiitsuliornerup isumaa tapersersorpaa, isumalioqqissaarnissamut itisilerinissamullu inissaqartitsilerluni.
Suleqatigiinnissamut periarfissagissaarnerulerneq
- 2020 katersugaasivimmut aamma piffissamik nutaamik nalunaaqutsiisuuvoq, Kalaallit Nunaanni eqqumiitsuliornermik katersugaasivinni siullersaalluni pisortatigoortumik akuerisaagami. Akuersineq pitsaasumik tunngaveqarnermik naqissusiivoq, anguniagaqarlunilu sulinerup imminut akilersinnaaneranik takussutissaalluni, Nivi Christensen oqarpoq.
Nuummi Eqqumiitsulianik Saqqummesitsivimmi siulersuisut:
Siulittaasoq: Tobias Hjorth Christiansen.
Ilaasortat: Jørgen Chemnitz, Katja Vahl, Peter ’Kujooq’ Kristiansen, Birgit Kleist Pedersen.
Sinniisussat: Aviaaja Rosing Jakobsen, Stine Selmer Andersen
Pissarsiffik: Nuummi Eqqumiitsulianik Saqqummersitsivik
Nivi Christensen naapertorlugu, akuerisaaneq aamma katersugaasivinnik pisortatigoortumik akuerisanik naalagaaffimmiillu akuerisanik pitsaanerusumik suleqateqarsinnaanermik periarfissiivoq.
Pisortatigoortumik akuerisaanermi siulersuisoqarnissaq aamma piumasaqaataavoq.
Ukiunik 15-inngortorsiornermi iserneq akeqasssanngilaq aamma eqqumiitsuliaq nutaaq saqqumersinneqassaaq. Tamatuma saniatigut, ukiuni 15-ini kingullerni saqqummersitsisarsimanernit plakatit 100-t akeqanngitsumik agguaanneqassapput.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...