eqqakkat
Nuummi eqqakkat aqqusinermit peerneqartut
Eqqakkat katersorneqarsimasut Nuummi aqqusernit sinaaniittut containerinut eqqortunut iliorarneqareerput
Juunip qaammataata aallartinnerani Nuummi kusananngitsunik saqqumisoqarpoq. Eqqakkat biilit unittaarfiini aamma aqqusernit sinaannut katersorneqarsimapput.
Kisianni maanna eqqakkat tamangajammik peerneqarsimalerput.
- Ataatsimut isigalugu torerpoq, Kommuneqarfik Sermersuumi eqqakkanut qitiusoqarfimmeersoq, Zenica Gosvig Larsen oqarpoq.
Innuttaasut amerlasuut eqqakkanut inatsisit nutaat paatsoorsimammatigit ajornartorsiutaavoq. Eqqakkatik angisuut nammineerlutik immikkoortiteriarlugit Nuummi eqqaavinnut juunip aallartinneranili ingerlaarunneqalersunut tunniunnissaannik tamanna isumaqarpoq.
Ullumi aamma aqagu eqqaaviit ingerlaarunneqartut Qinngorpumi nalunaaqutaq 16 aamma 20 akornanni Akeq, Suloraq aamma Qiterlia uninngaffigissavaat.
- Eqqaaviit inissisimaffiginikuusaa ingerlaarluta misissuiffigisaqattaarnikuuagut, ataatsimut isigalugu eqqakkat aqqusernup sinaaniikkunnaarsimapput, Zenica Gosvig Larsen oqarpoq.
Aqqusernup sinaanut eqqakkanik ilioraaneq inerteqqutaasoq kommunip naqissuserpaa. Eqqagaqassappat suminngaanneernersut paasiniarneqassapput, kingornalu pisuusut akiligassinneqarsinnaapput.
Eqqakkanik qitiusoqarfiup eqqaavinnik angalaarussinerisa naammassinerisa kingorna, sulianik akiligassissutissiisoqartariaqarnersoq aalajangiiffigissagaa, Zenica Gosvig Larsen oqarpoq.