Nuummi eqqaaveqarfiit taarserneqassasut
Inissiaateqarfiit namminersorlutik oqartussat ataanniittut, Illuut A/S aamma Ini A/S, eqqaaveqarfiutiminnik taarsersuiartuaassallutik aalajangersimapput. Eqqaaveqarfiit Nuup silaanut anorersuartarneranullu tulluanngillat.
- Lyngby-Tårbæksvejimi eqqaaveqarfiup qalia anorimit tingitaalerpoq. Eqqaatungaaniikkussi sianigalusi!
Nuummi kingullermik anorersuarujussuarmat, marlunngorneq 28. februar, nittartakkani attaveqatigiittarfinni nalunaarutit taama ittut atuarneqarsinnaapput. Najugaqarfinni allani aamma taama nalunaaruteqartoqarpoq, eqqaavimmi qaliai iigaalu teqqaasut naammattoorneqarput.
Inissiaatileqatigiiffiit Illuut A/S aamma Ini A/S Sermitsiaq.AG-mut ilisimatitsipput eqqaaveqarfiit peerneqartussanngorlugit aalajangerneqarsimasoq.
- Eqqaaveqarfiit silamit sunnerneqarujussuartarput. Eqqaaveqarfeqarnermilu aaqqiissutinik allanik taarsernissaat aalajangerparput, Ini A/S-ip pisortaa Henrik Rafn uppernarsaavoq.
- Eqqaaveqarfiit piffissap ingerlanerani taarseriartuaassavagut. Tamanna isumaqarpoq eqqaaveqarfiit sequmissimatillugit kingoraartissaanik nutaanik pisiniaqqissanngitsugut. Kingoraartissat sillimmataatigut nunguppata, eqqaaveqarfiit allaanerusunik taarsissavagut, Illuut A/S-ip pisortaa Torben Pauls Sermitsiaq.AG-mut ilisimatitsivoq.
Aaqqiissutit allat atorneqalissasut
Eqqaaveqarfiit namminersorlutik oqartussat ataanni inissiaateqarfiusunit Nuummi sanaartortussanngorlugit aningaasaliiffigineqaramik sivisuumik atasinnaasimanngillat. Eqqaaveqarfiit ukiut tallimanngulersut atareerput, anorersuartartilluguli qaliai iigaalu aserorlutillu katagartarput.
- Illuut A/S-ip eqqaaveqarfiutai qulingiluat anorersuarnerani kingullermi aseruatiterneqarput. Aserorsimasunut kingoraartissat suut piginerlugit misissussavarput. Kingoraartissagullu nungussimalerpata, eqqaaveqarfiit qisunnit sanaat, nammineerluta ilusilersugassagut, sanaartorlugit aallartikkumaarpagut. Taakku inissiaateqarfitta isikkuinut tulluarsarsimasuussapput, Torben Pauls oqaluttuarpoq.
Illuut A/S-ip eqqaaveqarfiit qanoq ittorpiaassanersut suli isumaliutersuutigaa. Pisortarli ilisimatitsivoq eqqaaveqarfiit maanna atortut toqqavii atoqqinneqarumaartut, eqqaaveqarfissallu qisuunissaat isumaliutersuutigineqartoq.
Misilittakkat akisuut
Illuut A/S-ip pisortaa Torben Pauls ilisimatitsivoq suliffeqarfiup Nuummi eqqaaveqarfiit 26-it 2018-imi sanaartortikkamigit 5,9 milliuunit koruuninik aningaasartuuteqarsimalluni. Eqqaaveqarfiit angissutsimikkut assiginngillat, agguaqatigiissikkaannili eqqaaveqarfimmut ataatsimut 227.000 koruunit atorneqarsimapput.
Aningaasat 6 milliuunit koruunit missaanniittut sanaartugassanut, toqqavissamut, angallannermut sanatitsinermullu atorneqarsimapput.
Ini A/S-ip maannakkorpiaq oqaatigisinnaanngilaa inissiaatileqatigiiffiup Nuummi eqqaaveqarfinnik 2018-imi sanaartortitsigami aningaasat qanoq amerlatingisut atorneqarsimanersut.
Ini A/S ilisimatitsivoq eqqaaveqarfinnik allaanerusunik ujartuinerup nalaani attartortut containerinik eqqaavilersorneqarumaartut. Taakkuli aamma kingoraartissat nungulluarnissaat utaqqeqqaassavaat.
Illoqarfinni allani misilittakkat pitsaalluinnartut
Eqqaaveqarfiit Nuummi atorneqartut Ini A/S-ip illoqarfinni allani inissiaateqarfiini aamma atorput. Henrik Rafn Sermitsiaq.AG-mut nassuiaavoq eqqaaveqarfiit Sisimiuni, Maniitsumi, Ilulissani Aasiannilu pitsaalluinnartumik misilittagaqarfigineqartut. Illoqarfinnilu allani atorluarsinnaammata Nuummi aamma atuutsinneqaleraluarsimasut.
- Eqqaaveqarfiit Europami sanaartornermi pitsaassutsit aallaavigalugit sanaajupput. Naatsorsuutaalluni nunatta silaanut aamma tulluussasut. Anorersuartartumi inissiinerluttoorneq nalaarneqarsinnaajuaannarpoq, oqarpoq.
Nuummi eqqaaveqarfiit kingulliit qaqugu piissanersut piffissalerneqanngilaq, kingoraartissat pisiarineqareersut tamakkerlugit atorneqarsimalernissaat inissiiaatileqatigiiffiit anguniarpaat.
