Nuummi efterskolimik timersorfiusumik ammaaniartut

Suliniuteqaqatigiit inuusuttunik timersornermillu soqutigisaqartut maanna Nuummi efterskolimik timersorfiusumik pilersitsinissamut aningaasaliissutinik katersiniarsaripput.

- Kalaallit Nunaanni efterskolimik pilersitseqqinnissamut piffissanngortoq isumaqarpugut, tassani timersorneq ilikkariartornerlu ataqagiisillugit pisariaqartitsineq naammassisinnaallutigit, suliniuteqartut siulittaasuat Finn L. Nielsen, Namminiilivinnermut, Pinngortitamut, Avatangiisinut Nunalerinermullu naalakkersuisoqarfimmi pisortaasoq oqarpoq.

Isikkammik arsaattartunut nunanut allanut unammisartunut sungiusaasut René Olsen aamma Tekle Ghebrelul suliniuteqartunut ilaapput, kiisalu timersornermut siunnersorti Aviaaja Geisler aamma siulersuisunut ilaasortaq Ole Kielmann Hanse, marluullitk Kalaallit Nunaanni Timersoqatigiit Kattuffianneersut.

Danmarkimi taamaatitsiinnartartut amerlasuut
Kalaallit inuusuttut Danmarkimi efterskolimi aallartittartut 20 procentiisa misssaat taamaatitsisartut, sapaatip akunnerata aallartinnerani Sermitsiaq.AG-mi allaaserineqarpoq, taakkulu danskinit inuusuttunit taamaatitsisartunit amerlanerupput.

Atuaruk: Kalaallit efterskolimi atuartut amerlasuut taamaatiinnartarput

- Nuummi timersorfiusumik efterskoli tamanna angerlarsernermik, kulturikkut assigiinngissuteqarnermik aamma oqaatsitigut unammilligassaqarnermik isumaqarneq aallaavigalugu sulissaaq, tamanna 14-16-illu akornanniinnaq ukioqartilluni angerlarsimaffimmiillu 3.500 kilometerisut ungasitsigisumiilluni aqukkuminaassinnaavoq, siunnersorti Christian Keldsen paasissutissiinermi nassuiaavoq.

Aappaagu aallartisarnissaa neriuutigineqartoq
Inuusuttut Nuummi efterskolersinnaagunik efterskolimik timersorfiusumik pilersitsiniarlutik suleqatigiit naammassinnittarnermut pitsanngorsaataassasoq upperaat, taakkulu aningaasaqarneq inissinniarlugu sulissuteqarput.

- Pilersitsinissamut aningaasaliissutit nassaarinissaat pisariaqartinneqarpoq, ilaatigut atuarfimmi pisortamik atorfinitsitsinissamut aamma init atortullu eqqortut pissarsiarinissaannut, Christian Keldsen oqarpoq.

2017-ip naanerani atuarfiup atuartussanik akuersinissaa anguniagaavoq, taakku aggustimi 2018-imi aallartissallutik. Atuartussaasut 9. aamma 10. klassimi atuartut siunnerfiupput.