Nuummi coronavirusimik tunillatsittut arlaqarput
Coronavirusimik tunillatsissimalersut maanna marlunnik ilasut, Naalakkersuisut siulittaasuata Kim Kielsenip tusagassiortunik katersortitsinermi ilisimatitsissutigaa
Kim Kielsen tusagassiortunik katersortitsinermi alianartumik nalunaaruteqarpoq.
Nakorsaaneq Henrik L. Hansen arfininngornermi ilisimatitsivoq misissuinerit tamarmik tunillatsittoqarsimannginneranik nalunaaruteqarpoq, tunilaattoqannginnera naqissuserlugu.
Maannali piviusoq alla saqqummerpoq.
- Misissuinerit 77-it nutaat pissarsiaraagut, ajoraluartumik marluk tunillatsissimasut paasineqarpoq. Taakku Nuummeersuupput, Kim Kielsen ilisimatitsivoq.
- Tunillatsittup aappaa Namminersorlutik Oqartussanut attuumassuteqartumut qanigisaavoq, tamannalu pissutigalugu sukaterisoqaqqippoq. Tamanna pissutaalluni tusagassiortunik maaniittoqanngilaq. Namminersorlutik Oqartussani inuit qanoq qanitsigisinnaanerat maanna sukaterneqalerpoq, Kim Kielsen nassuiaavoq.
- Namminersorlutik Oqartussat allattoqarfiani sukaterisoqassaaq, Kim Kielsen oqarpoq.
- Ernumassuteqarpunga, oqarpoq. Innersuussutigineqartut tamanit malinneqarnissaat oqaaqqissaarutigaa, akisussaaqatigiinnissaq salliutinneqassasoq tikkuarlugu. Saqqummeereerami oqaatsini ima naggaserpai: Qanortoq Naalakkatta paarilisi, sernigalisilu.
Imigassartutortoqannginnissaa
Aalakoornartortalinnik imertoqannginnissaa anguniarlugu sukaterisoqaratarsinnaanera Kim Kielsenimit oqaatigineqarpoq. Maannali matusigallarnissamik eqqartuinissaq piffissaanngitsoq oqaatigaa.
- Tunillatsittup aappaa Namminersorlutik Oqartussanut qanigisaavoq. Ima qanitsigaaq, allaat Nunatta Nakorsaaneqarfiani sulisut ilaat tunillatsissimasinnaanerat ilimanaateqarluni. Taamaattumik immikkut ittunik iliuuseqarpugut. Kim Kielsen tunillanneqarnaveersaarpoq, taamaattumik maanna kisimiippunga. Taamaattoq allanik nutaanik nalunaarutissaqanngilaq, nakorsaaneq oqarpoq.
- Ilisimatusarfimmut attuumassuteqarpoq tunillatsittup aappaa. Tassani tunillatsittoqarsimanera tupaallannanngilaq, Henrik L. Hansen oqarpoq.
- Inuit attuumassuteqarsinnaasut tamarmik nalunaarfigineqareerput, aamma misissuinerpassuit ullumi tiguagut, marluk tunillatsissimaneri paasivarput. Tallimanngormat misissuinerit inerneraat, ikitsunnguit tallimanngornerup siunitsianngua misissugaallutik.
Tunillaasoqanngilaq
- Nuummi siammasissumik tunillaasoqanngitsoq erseqqissaatigiumavara, innersuussutigineqartut tamaasa malinneqarpata tunillaasoqassanngilaq, Henrik L. Hansen oqarpoq. Illoqarfinni allani tunillaasoqarnissaa ilisimagineqanngitsoq aamma oqarpoq.
- Illoqarfinni allani tunillatsittoqarsimappat, Nuummi sukaterisoqarneratut sukaterisoqassaaq. Coronavirusimik tunillatsittoqarsimasinnaaneranik taamaattoq ersiuteqartoqanngilaq, oqarpoq.