Nuummi biilinik aserorterinerpassuit

Ulluni kingullerni Nuummi biilit uninngasut unnuakkut aserorteriffigineqaqattaarsimapput.

Taamatut nalunaarput Sermersuumi politiit.

Biilit aserorteriffigineqartut illoqarfimmi sumi tamaaniipput, pingaartumik Nuussuarmi illoqarfiullu qeqqani.

Biilit ujaqqanik milloorlugit

– Manna tikillugu biilit arfineq-marluk aserorteriffigineqarsimapput, aserorterinerillu pisimapput juunip 22-ata 24-atalu akornanni, Brian Thomsen, illoqarfiit pingaarnersaanni Nuummi politikommissæriugallartoq oqaluttuarpoq.

– Aserorterisup, imaluunniit aserorterisut, biilit igalaavi ujaqqanik milloorlugit aserortertarsimagunarpaat. Pisut amerlanerpaat unnuakkut pisarput ataaserlu ullukkut pisimalluni.

Misigisaq eqqugaasunut uggornaqaaq

Politiit Nuummi innuttaasut kajumissaarpaat arajutsisaaqqullugit pasinapiluttumillu takugunik sumiginnaaqqunagit, soorunamilu politiit attaveqarfigineqasssapput aserorterisumik allatulluunniit pinerluttumik takunnikkaanni, tassa aserorterineq pinerluttuliornerummat, ´nukappiarapalaasaarneruinnarani´.

– Ajoraluartumik pisimasut arlaannaanniluunniit aserorterinerup nalaani aserorterisut naammattoortarsimanngilagut, aserorterinerit aatsaat ullaakkut paasineqartarmata. Aserorterinikkut inukkut timaatigut aqqunarneqarneq ajoraluarpoq, eqqugaasunulli tamanna uggornaqaaq akisoqalunilu. Biiliutillillu kingorna biiliutini iluarsaatsissavaa. Taamaattumik pisimasut erloqinartutut isigaavut neriuppugullu sapinngisamik piaartumik unitsikkumaarlutigit - kissaatiginaqaarlu innuttaasut ikiortigalugit, Brian Thomsen oqarpoq.