Nuummi atuarfimmi tunillatsissimasoqaqqittoq
Nuna tamakkerlugu tunillatsissimasut nutaat sisamat paasineqarsimapput. Tunillatsissimasut ilagaat Nuummi ASK-imi atuartoq ataaseq. Atuaqatigiiaat ataatsit angerlartinneqarallarput, sillimaniarnerlu pillugu atuareernerup kingorna ornittagaq Illu matuneqarallarluni.
Kommuneqarfik Sermersuumit nakorsaaneqarfimmiillu paasissutissat nutaat aallavigalugit nutarterneqarpoq. Tunillatsissimasut pingasuunngillat, sisamaallutilli.
Sermitsiaq.AG-p paasisai malillugit nuna tamakkerlugu tunillatsissimasut sisamat nutaat paasineqarsimapput. Tunillatsissimasut sisamat tamarmik Nuummiipput.
Nuummi sisamanngornermi misissortissimasut ilaanni paasineqarpoq atuarfimmi atuartoq ataaseq tunillatsissimasoq. Taanna Atuarfik Samuel Kleinschmidtimi atuartuuvoq.
- Atuartup atuaqatai angerlartinneqarput, atuartullu angajoqqaavi attavigineqareerput misissortinnissaannillu kaammattorneqarlutik, Kommuneqarfik Sermersooq tusagassiorfinnut nalunaarummini ilisimatitsivoq.
Atuartut angerlartinneqarallartut angerlarsimaannarallaqqaassapput misissortillutillu. Tunillatsissimasumut qanillisimanermit ullut arfineq-aappassaanni misissorteqqissapput. Ullut arfineq-aappassaanni misissortinnerup tunillatsissimannginneq takutippagu, atuartut atuariartoqqissinnaalissapput.
Pingasunngormat paasineqarpoq atuarfimmi Ukaliusami, USK, atuartut ilaat tunillatsissimasoq. Taamaattumik atuaqatigiiaat arlallit angerlartinneqarput, atuareernerullu kingorna ornittagaq Narsarmiutaq matuneqarallarluni.
AKO matuneqartut
Tunillatsissimasup nutaap paasineqarneranut atatillugu atuareernerup kingorna ornittagaq Illu matuneqarallarpoq, atuarfimmut attuumanera pissutigalugu.
Nuummi uku suliniutigineqarput:
- ASK-mi atuaqatigiiaat ataatsit angerlartinneqarsimapput
- USK-imi atuaqatigiiaat pingasut angerlartinneqarsimapput
- AKO Narsarmiutaq matuvoq
- AKO Illu matuvoq
- Meeqqerivik Timmiaaqqat matuvoq
- ASK atuaqatigiiaat angerlartinneqartut AKO Illullu saniatigut, USK-imi atuaqatigiiaat angerlartinneqarsimasut meeqqerivimmilu meeqqat angerlarsimaannaqquneqarallartut ataasinngorpat misissorneqassapput, kommuni nalunaaruteqarpoq.
USK-imi atuaqatigiiaat marlunngornermi 14. september atuariartoqqissinnaalernissaat naatsorsuutigineqarpoq, soorlu aamma Narsarmiutaq Timmiaaqqallu marlunngorpat ammarnissaat naatsorsuutigineqartut. Ammarnissaat nakorsaanerup akuersissutigeqqaassavaa.