Nuuk
Nuummi arnaq toqunniarlugu sioorasaaraa
Nuummi Politiit Nuussuarmi unnuaq pisumut takunnittunik ujaasipput, tassani angutip arnaq sakkumik ilisimaneqanngitsumik sioorasaarpaa
Marlunngornerup unnuaani apriilip 19-ani nalunaaqutaq 01.00 missaani‚ arnaq Nuussuarmi Nuniaffimmi meeqqeriviup 'Mukup' eqqaatigut ingerlaartilluni angummit kinaassusersineqanngitsumit sioorasaarneqarpoq.
Politiit taama ilisimatitsipput.
Toqunniarlugu sioorasaraa
Arnap oqaluttuaraa, kisimiilluni pisutsilluni angutip tunuaniit tiguaa, angerlaqatigiumanngippagulu toqunniarlugu kalaallisut oqarfigaa.
Taamaalinerani angutip sakkoq suuneranik ilisimaneqanngitsoq arnap qungasianut tutsippaa. Arnaq nillialerpoq, kingornalu angutip eqqissilluni qimappaa.
Ilisarnaatit
Arnap pisoq politiinut unnerluutiginikkami, angut ukuninnga ilisarnaateqartoq nalunaarutigaa:
- Kalaalerpaluttumik isikkulik
- 170 - 175 centimeterit missaanik angissusilik
- Nalinginnarmik timilik
- Naatsunik taartunik nujalik
- Tungujortumik kavaajalik aamma taartunik qarlilik
Takunnittunik ujaasisut
Nuummi Politiit suliamut attuumassutilimmik takunnittunik ujaasipput, imaluunniit angutip kinaaneranik ilisimannissinnaasunik.
Politiit uunga attavigineqarsinnaapput telefon 70 14 48.