Nuummi apummik ilusilersukkat ullumi peerneqassapput
Apummik ilusilersuinermi ajugaasut sapaammi 5. marts akissarsitinneqarput. Apummik ilusilersukkat kiannerani aakkiartorlutik aseruatitersinnaammata, maanna assersorneqarsimapput. Sillimaniarnerlu pillugu ullumi peerneqartussanngorlutik.
Nuuk Snow Festimi apummik ilusilersuisut kiannerani ilungersungaatsiarsimapput. Ilusilersuilluni ulapaarnerpaaffiusumi, arfininngornermi, Nuuk 15 gradenik kiappoq.
Nuuk Snow Fest maanna naammassisimalermat, apummik ilusilersukkat Nuutoqqami kusassaataasaraluartut, ullumi peerneqartussanngorlugit Kommuneqarfik Sermersooq aalajangerpoq. Apummimmi ilusilersukkat sequmillutik nakkaasinnaapput.
- Apummik ilusilersukkat maanna assersorneqarput, innuttaasullu alakkaasut ilusilersukkat tikivissanngikkaat kaammattuutigaarput, ajoqusertoqaratarnissaa aarlerinarmat. Aalajangerpugut apummik ilusilersukkat ullumi piiarneqassasut, sillimaniarneq pissutigalugu, aaqqissuussami Nuuk Snow Fest 2023 aqutsisoq, Alberte Parnuuna Sermitsiaq.AG-mut oqaluttuarpoq.
Nuutoqqami apummik ilusilersuisoqarnerani peqataasut 15-it assassungaatsiareersullu, ajugaasoq sapaammi nal. 14.00 nalunaarutigineqarpoq. Ilusilersugaq "Qaqqat Naalagaat"-nik taaneqarsimasoq ajugaavoq.
Ikiueqqaarneq iluarsiiniarnerillu
Aaqqissuussami aqutsisup unammisitsineq ingerlalluartutut nalilerpa, naak silap kiannerani peqataasut unammillerneqangaatsiarsimagaluartut.
- Silaqqilluinnarmat apummik ilusilersuisunik takusaasut sivisunerusumik isiginnaartarput, alakkaasullu amerlalluinnarlutik. Workshoppertitsinerit oqalugiarnerillu aamma peqataaffigineqarluarput. Ataatsimut isigalugu aaqqissuussaq iluatsilluarpoq, Alberte Parnuuna oqaluttuarpoq.
Ilusilersiunermi peqataasut ilaat ilusilersugaat suli naammassinatik sequmittalereersimagaluarput, taamaattumillu iluarsaanneqarniartarsimallutik. Unammisulli tamarmik sapaammi nal. 12.00 ilusilersukkamik naammassisamik tunniussaqartut, aaqqissueqataasoq ilisimatitsivoq.
- Ilusilersuinermi ullut pingajuanni peqataasut ilaasa suliaat nakkaalluni sequminnersaqaleraluarpoq. Aaqqissuunniarnerali iluatsippoq. Peqataasut allat ilusilersugaat aamma tunniussivissamut akunnerit marluinnanngortullu taliiaraluarpoq. Taakkuli aamma akunnerit marluk ingerlaneranni iluarsiipallapput, pikkoreqaat, oqaluttuarpoq.
Apummik ilusilersukkat ippassaq assersorneqarput, silap kiannerani nakkaalersinnaaneri pissutigalugit.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...