Nuummi anorersuarpoq: Qalissiat allallu teqqaammata politiit mianersoqqusipput
Nuummi maanna anorersuarpoq, sumiiffinnilu arlalinni tamanna ulorianartorsiortitsilersinnaavoq. Nuussuup Qinngorpullu akornanni aqqusineq matugallarneqarpoq, innuttaasullu arlallit najukkaminnit qimagussuunneqarsimalerput. Silami qalissiat allallut teqqaasinnaammata politiit mianersoqqusipput.
Nuummi facebookikkut ilisimatitsisarfimmi, Nuuk Borger Infomi assit mianersoqqussutillu arlallit maannakkorpiaq siammarterneqarput. Qalissiat teqqaapput, sanaartortut sullivii ikaat aqquserngillu sinaani qullersuit aamma uppissimapput.
Nuummi maanna anorersuarpoq, naatsorsuutigisamit kingusinnerusumik anorersualerluni. Anoraasuarujussuartarnerili sakkortulluinnarmata sumiiffinni arlalinni ulorianartoqarsinnaavoq. Nuummi politiit akunneq ataaseq qaangiuppoq mianersoqqussummik Facebookikkut nalunaaruteqarmata. Innuttaasut isersimaannaqquneqarput, anorimit teqqaasut ulorianarsinnaammata.
Innuttaasut arlallit qimagussuunneqartut
Nuussuup Qinngorpullu akornanni aqqusinermi biilit arlallit ingerlaqqinnaveerlutik marrissimapput. Politiillu aqqusineq matugallarpaat.
Kalaallit Nunaata Politiivini pigaartut pisortaat Julie Senderovitz Bendtsen oqaluttuarpoq innuttaasut arlallit biilinit qimagussuunneqartariaqarsimasut.
- Qatserisartut ikiortigalugit innuttaasut biiliniittut qamuteralannik aasariaqarsimavagut, isumannaatsumillu apuuffissaannut apuullugit, pigaartut pisortaat oqaluttuarpoq.
Aqquserngit assersorneqarsimaneri innuttaasut ataqqissagaat taanna kaammattuuteqarpoq, ulorianarnerusunik pisoqannginnissaa pillugu.
Aqqusinermi pisariaqanngitsumik angalaqqusinngitsut
Nuup Bussii angallassinertik nal. 17.00 missaani unitsippaat. Politiit nal. 18.00 missaani nalunaaruteqarput Nuussuarmit Qinngorput tungaanut aqqusinermi angallanneq unittoorluinnarsinnaasoq, isikkivilunnera pissutigalugu.
Silap qanoq innera pillugu politiit pingasunngornermi ullaakkut nalunaaruteqaqqissapput. Tassani ilanngullugu nalunaarutigissallugu aqqusinermi angallanneq isumannarnerulersimanersoq, politiit allapput.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...