Nuummi angut toqungasoq nassaarineqartoq: Politiit suliaq toqutsinertut misissorpaat
Angut ullaaq sisamanngornermi politiinit Nuussuarmi Iggiaani sikup ataani nassaarineqarpoq. Politiit angut taartumik kavaajalik aamma qarlippaalik ujaarivaat.
Politiit sillimasoqarfiat ullumi nal. 08.00 missaani pasinartoqarneranik nalunaarfigineqarput, tassani nalunaartoq pigisanik aammillu Pub Nuan eqqaani Nuussuarmi nassaarsimavoq, piginnittumillu inummik nassaarani.
Politiinspektøriugallartoq, Laila Fleischer, Nunatsinni Politiit, tusagassiuutinut nalunaarummi taama ilisimatitsivoq.
- Politiit sumiiffimmukarput misissuinerlu aallartillugu, misissuinermi Iggiaani sikup ataani angut toqungasoq nassaarineqarpoq. Kingorna angut toqusutut nalunaarutigineqarpoq, politiinspektøriugallartoq allappoq.
Angummik ujaarinnittut
Politiit suliaq maanna toqutsinertut misissorpaat, angullu 170-180 centimeterit missaanni angissuseqartoq, taartumik kavaajaqarlunilu qarlippaalik ujaarivaat, taassuma sumiiffik kimmut ingerlalluni qimakkaa takuneqarpoq.
Nal. 01.00 aamma 03.00 tikillugu inuit Iggiaani Pub Nuannip eqqaaniissimasut, aamma suliamut atatillugu paasissutissaateqarsinnaasut soqutigisaqartullu, tamatumunnga atatillugu Nuummi politiinut oqarasuaat 701448-mut, imaluunniit aggerlutik saaffiginninnissaat politiinit qinnuigineqarput.
- Politiit maannamut suliaq pillugu oqaaseqaqqissinnaanngikkallarput, tusagassiuutinut nalunaarummi tamanna oqaatigineqarpoq.