Nuummi angerlarsimaffeqanngitsut peqatigiiffittaarput: Politikerit oqariartuuteqarfigisarniarpaat

Silaannaq aallussilluarnermik, pujorsunnimik aamma pissanganermik ulikkaarpoq.

Kaffisorpalaaq aamma kaageerartorpalaaq, kuglepenninik toortaarpalaarneq tusarsaapput, tassani siulittaasunngortussaq paasineqangajalerpoq. 61-inik ukiulik Karl Åge Lyberth qinigassanngortittut ilagaat. Taanna angerlarsimaffeqanngitsunut peqatigiiffimmik pilersitsinissamik suliaqarpoq – soqutiginninnerlu malugineqarsinnaavoq.

Nalunaaqutaq unnukkut arfineq-marlunngorpoq. Ini Frelsens Hærip atukkiussaa inunnik ulikkaarpoq. Tamarmik taakku ataatsimik assigiissuteqarput: Angerlarsimaffeqanngitsuupput, atugarinnerulernissaminnillu neriuuteqarput.

- Peqatigiiffimmik pilersitsisoqartariaqartoq isumaqarpunga, uagut (angerlarsimaffeqanngitsut, aaqq.) kommunimut Inatsisartunullu pitsaanerusumik suleqateqarsinnaaniassagatta, Karl Åge Lyberth oqarpoq.

Atukkat pitsanngorsarneqassapput

Arlalinnik suliniuteqarniarpoq. Pingaarnertut angerlarsimaffeqanngitsut unnuisarfiini atukkanut tunngapput. Taakku pitsanngorsarneqartariaqarput, Karl Åge Lyberth isumaqarpoq. Unnuisut namminneq eqqissisimaarsinnaasariaqarnerat aamma peqqinnarnerusunik pitsaanerusunillu nerisaqarnissaannik peqatigiiffik ilaatigut suliniuteqartariaqarpoq.

- Inimi mikisumi inuit tallimat, arfinillit ilaatigullu arfineq-marluk ineqatigiittarpugut. Tamanna iluaassinnaasarpoq, taanna nassuiaavoq.

Karl Åge Lyberthip takkuttut tikilluaqqulerpai. Allattarfiup saavanut nikuippoq, tassani unnummut oqaluuserisassat tulleriiaarlugit allattorneqarsimapput. Karl Åge Lyberth pissangalluni oqaluttuarpoq, immaqalu annilaangalaarluni, kisianni tassani nikorfanermini siulittaasussaqqippoq.

Akunnerup affaa saqqummeereernerup aamma peqatigiiffiup sunik sulissuteqarsinnaaneranik oqallinnerup kingorna unillatsiartoqarpoq. Nathanael Münch, Nuummi Frelsens Hærimi aqutsisoq, kaffimik qalarlaamik kannini, chokoladeborlunik kaageeqqanillu qaqitsisimavoq.

Taakku piumaneqarluarput.

Pisoqalerpoq

41-nik ukiulik Thala Knudsen kaffi kannimik tigusivoq. Immiartorfimmut plastikkimut kuisivoq, aneerasaartarfimmullu pujortariarluni. Seqinnerpoq.

- Kommunimut politikerinullu oqaluttuarsinnaanissarput pingaarutilerujussuuvoq. Angerlarsimaffeqanngitsut ilitsersorneqarnissaminnik pisariaqartitsisut amerlapput. Amerlasuut tusarneqarusupput, Thala Knudsen, peqatigiiffik pillugu taama oqarpoq.

Taanna qaammatini pingasuni angerlarsimaffeqanngilaq.

- Aqqusinermiiginnarluni majuartarfeqarfinnilu sinittarluni artornarpoq. Siornatigut misilissimanagu artornartorujussuuvoq, taanna nikallungasunik iseqarluni oqarpoq.

Thala Knudsen qiterluppoq sulisinnaananilu. Meeqqani pingasut najugaqatigisimagaluarpai, upernaarlu anisitaasimapput. Nammineq inissarsinissami tungaanut maanna ataataminni najugaqartut, Thala Knudsen nassuiaavoq.

Taassuma angerlarsimaffeqanngitsut unnuisarfiani siniffissamik pissarsiniarluni kommunimut arlaleriarluni saaffiginnittarsimagaluarpoq. Kisianni ajornakusoorpoq, taanna nassuiaavoq.

- Arriitsumik ingerlasoqarpoq. Unnuisarfinnut allatsikkumaartunga kommunimit pingasoriarlunga oqarfigineqarpunga. Kisianni susoqanngilaq. Angerlarsimaffeqanngitsut unnuisarfiinut iserniaraluarpunga, kisianni allattorsimaffimmiinngilanga, taamaammat illoqarfimmi angalaartariaqartarpunga, taanna oqarpoq, nangillunilu:

- Unnugu sumi sinissanerlunga naluara.

Akunneq aalajangiiffiusoq

Inimi qinersinissamut piffissanngorpoq. Takkuttut arfinillit, Karl Åge Lyberth aamma Thala Knudsen siulersuisunut qinigassanngortipput.

- Annilaangaqaanga, Thala Knudsen inimi tunorlermit isussuppoq.

Takkuttut akornanni isumaqatigiittoqartupilussuuvoq. Qinigassanngortittut tamarmik siulersuisuni ilaasortatut akuerineqarput. Kisianni pissanganartortaa qaangiutinngilaq.

Maanna siulersuisuni siulittaasumik siulittaasullu tullianik qinersisoqalerpoq. Nathanael Münch pappiaqqanik kuglepenninillu agguaavoq. Taasinernillu kisitsinermut ikiuuppoq.

Karl Åge Lyberth taaneqarnerpaavoq. Thala Knudsen allalu taaneqarnerpaanut tulliupput – siulittaasup tullersortissaa makitsissutigineqassaaq, maannakkulli pissanngilaq. Thala Knudsenip tapersersorneqarnini nuannaarutigaa. Karl Ågellu aamma, taassuma tatigineqarnini nuannaarutigaa. Qungujulavoq.

Nalunaaqutaq unnukkut qulingiluanngorpoq. Angerlarsimaffeqanngitsut peqatigiiffiat pilersinneqarpoq, atissaali suli inissivinngilaq.

Inimi qiimmatsallutik nakkussipput. Ini kaageeqqanik siunissamullu neriulluarnermik ulikkaarpoq, ulloq siulleq pitsaasumik qaangiuppoq, kisianni peqatigiiffiup avissaannginnerani Karl Åge Lyberth guitarimik tigusivoq. Erinarsuutillu agguarneqarneranni sukaterivoq.

"Kun En Dag, Et Øjeblik Af Gangen", ullormi tassani naggasiutitut erinarsorneqarpoq.