Nuummi angerlarsimaffeqanngitsut inissaannik sanaartortoqassasoq
Illoqarfiit pingaarnersaata kommuniani kommunalbestyrelsi aalajangersimavoq, angerlarsimaffeqanngitsut inissaannik nutaanik sanaartortoqassasoq, taakku tassaassapput angutit arnallu immikkut unnuisarfissaat inissiallu mikinerit arlallit.
Illoqarfimmik ineriartortitsinermi ingerlatsivik Nuuk City Development (NCD) angerlarsimaffeqanngitsut inissaannik nutaanik sanaartortoqarnissaanut pilersaarusiortuussasoq Sermitsiaq.AG-mit paasineqarsimavoq. Suliassaq ukioq manna suliarinnittussarsiuunneqassaaq, ukiorlu ataaseq qaangiuppat inissat iserterfigineqarsinnaanngussallutik.
Angerlarsimaffeqanngitsut inissaasa nutaat piareerneqarnissaasa tungaanut, illoqarfiup qeqqani inissiat inoqanngitsut kommunimit atorneqassapput, tamatumunngalu peqatigitillugu containerit najugaqarfigineqartut arlallit kommunimit pisiarineqassallutik.
Tupeqarfiugallartoq
Angerlarsimaffeqanngitsut umiarsuit Atlantikukkoortaatit talittarfiata nutaap eqqaaniittumi tupeqarfimmi maannakkorpiaq najugaqartinneqarput. Tupeqarfik pilersinneqarsimavoq, martsip qaammataani coronap tuniluunneranut atatillugu. Tupeqarfimmi angerlarsimaffeqanngitsut najugaqartut martsip qaammataaniit en procentimik amerlanerulersimapput, maannalu 120-nit najugaqarfigineqarlutik.
Tupeqarfik septemberip aallaqqaataata tungaanut atuutsinneqarallassaq, tassa utaqqiisaasumik inissat atuutsinneqalernissaasa tungaanut. Suliniutaagallartunut tamanut 4,6 millioner koruunit angullugit maannamut atorneqarsimapput.
Borgmester Charlotte Ludvigsen aalajangernermut nunaarutiginnittoq:
- Angerlarsimaffeqanngitsut annertuumik uummateqarfigaakka, maannalu taakku inuunerminnik ingerlatseqqinnissaat ikiorserniarlugu inissanik sanaartortitsilernerput politikkikkut suliaqarnerup inerneraa, tamannalu tulluussimaarutigeqaara, sCharlotte Ludvigsen IA-meersoq oqarpoq.
Siumut tapersersuisoq
Kommunalbestyrelsip juunip aappaani immikkut ittumik ataatsimiinnerani, tamanna politikkerinit amerlanerussuteqartunit aalajangiiffigineqarsimavoq.
Siumumit tupeqarfik siusinnerusukkut isornartorsiorneqarsimavoq, partii isumaqarami akisuallaartoq. Siumumit isumaqartoqarpoq tupeqarfik piaarnerpaamik matuneqartariaqartoq, tamannalu pissutigalugu angerlarsimaffeqanngitsut pillugit pilersaarummut annertuumut partii tapersersuisinnaasimanngitsoq nassuiaatigineqarsimalluni. Siumut isumaqarpoq inissiat blok c aamma blok d illoqarfiup qeqqaniittut maannalu inoqanngitsut, ataavartumik aaqqiisoqarnissaata tungaanut, angerlarsimaffeqanngitsunut inissiaagallarsinnaasut.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...