Skip to main content

Nuummi alla ataaseq aamma tunillatsissimavoq

Ippassaq Nuummi Inuk alla coronamik tunillatsissimasoq paasineqarpoq, pingasunngornermilu tusagassiortunik katersortitsinermi ilisimatitsissutigineqarpoq, inuk alla aamma tunillatsissimasoq

Nuummi inuup allap tunillatsissimaneratigut inuit sisamat coronamik tunillatsissimalerput, marluk ajorunnaarsimapput. Tunillatsissimasut tamarmik Nuummi angerlarsimaffimminni imminnut mattuteqqapput.

Tassa misissukkanit 68-iusunit ataaseq tunillatsissimasoq paasineqarpoq.

Attaveqaqatigiinnermi Naalakkersuisoq Karl Frederik Danielsen ullumi pingasunngornermi nalunaaqutaq ataatsimut tusagassiortunik katersortitsinermi taamatut ilisimatitsivoq. Tusagassiortunik katersortitsinermut Aalisarnermut, Piniarnermut Nunalerinermullu Naalakkersuisoq Jens Immanuelsen aamma peqataavoq.

Nunatsinni Nakorsaaneq Henrik L. Hansen skypekkut coronamik tunillatsissimasoq kingulleq pillugu pissutsinik itisiliivoq.

Tupaallannanngitsoq

- Tamanna tupaallannarpallaanngilaq, tunillatsissimasutummi nalunngeriikkatsinnut attuumassuteqarmat. Soorunami ajuusaarnarpoq, pingaaruteqarluinnarporli Danmarkimiit Kalaallit Nunaannut tikittut angerlarsimaffimminniiginnarnissaat, aamma pulaartoqaratillu allanut pulaannginnissaat, tuniluunnersuaqalernissaa pinngitsoortissagutsigu tamanna aalajangiisuulluinnartussaammat, nunatsinni nakorsaaneq oqarpoq.

Politimesterip Bjørn Tegner Bayp erseqqissaatigaa, nunaqarfimmi najugaqaraanni allanillu periarfissaqarani, illoqarfiliarluni niuerniarsinnaaneq ajoriffissaqartinneqanngitsoq. Tikeraarnissalli allat tamarmik pinaveersaartinneqartariaqarput.

- Kaammattuutigerusuppara, qaqugu illoqarfimmut allamut tikeraarsinnaaneq pillugu apeqqutissaqaraanni pigaartutsinnut sianernaveersaarnissaq. Atortorissaarutivut tamatuma artukkertarpai, ilungersunarnerujussuillu pillugit saaffiginninnissaq akorngusersinnaallugu, politimesteri oqarpoq.

- Illoqarfinnut allanut tikeraaqqusinnginneq inatsisitigut piumasaqaataanngilaq, inassuteqaataavorli. Taamaammat pingaaruteqarpoq, innuttaasut assersuutigalugu ilisiatorlutik aallartannginnissaat, tamatumalu pisut qanoq ilungersunartigisut atorivut takutippaa, Bjørn Tegner Bay oqarpoq.

- Annertuumik aqunneqarsinnaanngitsumillu tuniluuttoqalernissaa pinngitsoortissagutsigu, assatta errortarnissaanik, inuppassuit akornanniinnaveersaarnissamik minnerpaamillu to meterisut immitsinnut ingalassimaniarnissamik oqartussat inassuteqaataat malittariaqarpavut. Nuummi amerlanerpaamik inuit qulit katersuussinnaatitaapput. Nunap sinnerani inuit 100-t katersuussinnaatitaallutik, politimesteri nutaanik allanillu malittarisassaliortoqarsinnaaneranik erseqqissaasoq oqarpoq.

Nunatsinni Nakorsaaneq misissugassamik tigusiffigineqarsimasoq

Nunatsinni nakorsaaneq ilisimatitsivoq, misissugassamik tigusiffigineqarsimalluni, sulili akissummik tigusaqartoqanngitsoq.

Innutaasut nunami ingerlariaqqissinnaanngitsut pillugit Karl Frederik Danielsen oqarpoq, Tuniluuttumik nappaalanersuaqarnerani Ataatsimiititaliarsuup inassuteqaatai malinneqartut.

Napparsimasut angerlarnissaminnut utaqqisut qassit Nuummiippat?

- Napparsimasut 60-it 70-illua akornanniittut Nuummiipput. Ilaat immaqa angerlareersimassapput, ilaallu angerlamut ingerlaarlutik. Siunertaavoq napparsimmavipput artukkerniarnagu sapinngisamik amerlasuut illoqarfitsinnit qimagutsinneqarnissaat,nunatsinni nakorsaaneq oqarpoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER