Nuummi akunnittarfinni ukiuni kingullerni init nutaat 500-t
Takornariartitsineq pillugu oqallinneq arlalinnik sammiveqassaaq: Nunap immikkoortui assigiinngillat – takornariat aamma assigiinngitsuupput.
Ukiumi kingullermi Nuummi akunnittarfimmi init 500-t nutaat sanaartorneqarput:
HHE Express, Sømandshjemmet, Nordbo, Aurora, Inuk Hostels tamarmik takornariartitsineq mittarfissuarlu nutaaq 2024-mit anguniagaqarfigaat.
Aviisi Sermitsiaq allappoq.
Pisortaq Helge Tang Nuummi 278-inik akunnittarfinni inaataateqarpoq: Hotel Hans Egede (init 150-t) HHE Express (init 108) aamma HHE Apartments (init 20-t).
Helge Tang aamma Sulisitsisut Qitiusumik Ataatsimiititaliaani akunnittarfinnut, neriniartarfinnut takornariartitsinermullu siulittaasuuvoq. Nuummi Ilulissanilu 2024- imi siullermik tikinneqartussanik – tassa ukiut marluinnaat qaangiuppata - mittarfiit sanaartorneqarnerini, ineqarnermut attaveqarnermullu naalakkersuisup Erik Jensenip inuussutissarsiortut namminersortut pisariaqartillugu iliuuseqarsimanngitsutut pisuutitsinera, taassuma akerlilerpaa.
Ilulissani nunaqarfiit ataatsimeersuartinneqarnerisa kingorna Erik Jensen KNR-ip Radioaviisianut oqarpoq, nunarput mittarfissuarnut piareersimanngitsoq, tassani takornarissat inissakilliornerat takusimanerarpaa.
– Namminersortut akunnittarfinnik sanaartunngippata, taava uagut politikkikkut qanoq iliortariaqarnitsinnik nalilersueqqittariaqarpugut, Erik Jensen oqarpoq.
Helge Tang isumaqataanngilaq.
– Akunnittarfinnik neriniartarfinnillu sanaartorneq inuussutissarsiortut namminersortut suliassaraat, politikerillu akerlianik takornariartitsinermik inuussutissarsiortunut sinaakkutinik pilersitsissapput, ilaatigut aningaasaliinissamut periarfissat pilerinartut aamma aamma akunnittarfinnik neriniartarfinnillu sanaartornissamut nunaminertanik pisariinnerusumik sukkanerusumillu tunniussisinnaanikkut.
Ilanngutassiaq tamaat aviisimi Sermitsiami sapaatip-akunnerani matumani saqqummersumi atuaruk, ugguuna iserfigisinnaavat:
