Nuummi akiuussutissanik maannamut kapuisoqaqqissanngikkallarpoq
Akiuussutissanik nunat Europameersut pissarserusunnerat annertungaatsiarmat, nunatsinni qanoq amerlatigisunik pissarsinissaq, qaqugulu nalunarallarpoq. Illoqarfiit pingaarnersaanni siullermeerluni kapuinerit uninngatinneqarallassasut, oqartussat aalajangerput. Tunillatsissimasumut qanillivallaarsimasut ulluni 14-ini angerlarsimaannartalissapput.
Pingasunngornermi tusagassiortunik katersortitsisoqarmat Nunatta Nakorsaaneqarfiani nakorsaq Paneeraq Noahsen ilisimatitsivoq, Europami nunat akiuussutissanik piumanerat annertummat nunatta akiuussutissanik qanoq annertutigisunik, qaqugulu pissarsinissaa nalunarallartoq.
Taamaammat akiuussutissat nutaat tiguneqartut Ilulissani, Qaqortumi, Aasianni Sisimiunilu nutaamik kapuinermut atorneqartussatut pingaarnersiuinermi aalajangerneqarsimasoq, Paneeraq Noahsen oqarpoq.
- Nuummi akiuussutissanik siullermeertumik kapineqareersut aappassaanik kapitikkumaarput. Akiuussutissat pigineqartut naammanngimmata siullermeerluni akiuussutissamik kapitinnissamut Nuummi periarfissiisoqaqqinngikkallassaaq, Paneeraq Noahsen oqarpoq.
Kalaallit Nunaanni innuttaasut 2.584-it akiuussutissamik kapitereerput.
Peqqissutsimut Naalakkersuisoq, Anna Wangenheim ilisimatitsivoq nunatsinnut tikittartut tassaasut pisariaqavissumik tikittut. Nunatsinnut angallanneq nalinginnaasup pilersaarutit malillugit februaarip naanissaata tungaanut matoqqatinneqarnera atuutsiinnarneqassaaq.
Tunillatsissimasumut qanillivallaarsimasut angerlarsimaannarallartarnissaanut piumasaqaatit aamma sukaterneqarput.
Angerlarsimaannarnissaq sivisunerusoq
Tamanna isumaqarpoq innuttaasut coronavirusimik tunillatsissimasumut qanillivallaarsimasut ulluni 14-ini angerlarsimaannartalissasut, ullullu 14-issaanni misissortinnerup tunillatsissimannginneq takutippagu aatsaat angerlarsimaannarneq atorunnaartassasoq.
- Taamaasiorpugut coronavirusip Tuluit Nunaanneersup, Danmarkimilu siaruaakkaluttuinnartup, nunatsinni siaruaratarsinnaaneranik pinngitsoortitsiniarluta, Anna Wangenheim oqarpoq.
Taassuma erseqqissarpaa pissutsit qaamaneruleriartutut, sulili ilungersuanartoqarsinnaasoq.
- Piffissami aggersumi akiuussutissat amerlanerusut pissaqqaarpagut, tamatta tullinnguukkumaarpugut. Oqartussat attaviginasigit. Piffissaatillugu tullinnguukkussi attavigineqarumaarpusi, Anna Wangenheim oqarpoq.
Ukiortaareernerani angalasut 1770-it nunatsinnut tikissimapput. Taakkunannga tikittut kingulliit tallimanngormat tikipput.