Nuummi akiuussusersuinerit marlunngorpat aallartissapput
Coronamik tunillatsissimasoq sisamanngorpat paasineqareersorlu oqartussat 1971-imiit inunngorsimasunut akiuussusersuinialerput. Akiuussusersuinerit marlunngorpat nalunaaqutaq 08:30-imiit aallartissapput.
Illoqarfimmi pingaarnerpaami 50-inik ukiuliit utoqqaanerilluunniit marlunngorpamiit akiuussusersorneqalissapput. Akiuussusersuinerit Ukaliusap Atuarfiani pissaaq, akiuussusersuinerillu utoqqaanerniit tassa 61-inik ukiulinniit ukioqqortunerusunulluunniit aallartinneqassaaq.
- Marlunngorpat 61-iniit qummut ukiullut Ukaliusap Atuarfiani akiuussusersuisoqassaaq, pingasunngorpallu 60-iniit 57-inik ukiulinnut kapuisoqassalluni, taama Naalakkersuisut tusagassiutinut nalunaarummi allapput.
Pilersaarut ima isikkoqarpoq:
- Marlunngorneq, 1. juuni: 61-iniit qummut ukiullit tamarmik
- Pingasunngorneq 2. juuni: 60 – 57-inik ukiullit
- Sisamanngorneq, 3. juuni: 56 – 54-inik ukiullit
- Marlunngorneq, 8. juuni: 53 – 50-inik ukiullit
Piffissat taaneqartut iluanni ukioqatigiiaat agguaqqinneqarnissaat sulissutigineqassasoq, Naalakkersuisut paasissutissiipput. Allagartarsuit illoqarfimmi nivinngaassorneqassasut, nittartagaq corona.nun.gl aamma Naalakkersuisut facebook-ikkut nittartagaat aqqutigalugit akiuussutissanik kapuinissamut pilersaarut pillugu sukumiisumik ilisimatitsisoqartassasoq, Naalakkersuisut ilanngullugu paasissutissiissutigaat.