Nuummi akiuussusersorneqarsimanissaq piumasaqaataalerpoq
Nuummi tunillaasuuttoqareersorlu maleruaqqusat sukaterneqarput. Neriniartarfinni, timersortarfinni kikkut tamarmik isersimaffigisinnaasaaniluunniit akiuussusersorneqarsimanissaq coronamik tunillatsissimannginnermik 48 tiimini sivisunerpaamik pisoqaasuseqartumik takussutissaqarneq piumasaqaataalerpoq. Sisimiuni maleruaqqusat qasukkarneqarput.
Neriniartarfiliassaguit, filmertarfimmut nukkassartarfimmut Nuummi katersugaasivinnukassaguilluunniit naammassillutit akiuussutissamik kapitissimanissat imaluunniit coronamik tunillatsissimannginnermik uppernarsaamik 48 tiimini sivisunerpaamik pisoqaasuseqartumik takutitsisinnaanissat piumasaqaataalersoq, oqartussat tusagassiuutinut nalunaarumminni allapput.
Nuummiit Sisimiuniilluunniit nunatta sineriaanut
angalasoqartillugu malittarisassat aamma atuutsinneqarput.
Nuummi tuniluunerup unikaallatsinniarlugu maleruaqqusat sukaterneqarnissaat Naalakkersuisut aalajangiuppaat. Sisimiunilu maleruaqqusat
qasukkarneqarnissaat aalajangiunneqarluni tuniluuneq
Sisimiuni annikilliartormat.
- Nunatsinni ikioqatigiinnikkut, susassareqatigiinnikkut mianersoqatigiinnikkullu takutereerparput tuniluunneq unitsissinnaallugu. Taamaammat maannamut pisut ilinniarfigalugugit mianersorutta killiffipput anigulertorsinnaavarput, Kirsten Fencker maleruaqqusanik atuutsitsisoqalerneranut tunngatillugu taama oqarpoq.
Sisimiuni qanermut assiaqut atorunnaarsinneqarpoq
Sisimiuni qanermut assiaquteqarnissaq, inuit katersuusinnaasut 20-t kiisalu inunnut tamanut angallassissutini tamakkiisumik akiuussusersorneqarsimanissaq atorunnaarsinneqarput.
Sisimiuni killilersuutit qasukkaallatsinneqarnerini uku taamaallaat killilersuutaalerput: Sumiiffiit kikkunnit tamanit iserfigineqarsinnaasunut iserniaraanni tamakkiisumik akiuussuserneqarsimanissaq kiisalu Sisimiuniit aallarnermi maleruguassat.
Maleruaqqusat septembarip 30-at ilanngullugu ullumikkumiit atuutsinneqalerput.
Innuttaasut akiuussuserneqarsimanngitsut Sisimiuniit aamma Nuummiit angalasut suli maleruagassat malissavaat. Aatsaat ullut tallimassaanni misissortinnermi tunillatsissimannginneq uppernarsarneqarsinnaappat imaluunniit ullut 14-it angalarsimaannareernermi, sumiiffinnut tamanit orninneqartartunut orniguteqqusaalissapput katersuunnernullu peqataasinnaanngussallutik.
Maleruagassat atuarfinnut, ulluunerani paaqqinniffinnut, suliffeqarfinnut assartuutinulluunniit tamanit atorneqartartunut atuutinngillat.
Piffissap ilaani Covid-19-imik misissuisarnerit killeqarsinnaapput, misissuisarfinni inuit tunillatsissimasunik ujartuinermi nassaarineqartut aammalu inuit ersiutillit salliutinneqartarmata.
Sumiiffinnut ukununnga taamaallaat ornigussinnaavutit, tamakkiisumik kapitissimaguit imaluunniit coronamik tunillatsissimannginnermut uppernarsaammik sivisunerpaamik nal. ak. 48-nik pisoqaassusilimmik takutitsisinnaaguit:
- Neriniartarfiit, kaffisorniartarfiit, imerniartarfiit, diskotekit assigisaallu, kiisalu silami nunaminertat taakkununnga atasut.
- Kulturikkut sullissiviit: kulturikkut illorsuit, filmertarfiit, katersugaasiviit, inersuit saqqummersitsiviit assigisaallu.
- Innuttaasut illui assigisaallu.
- Atuakkanik atorniartarfiit.
- Illup iluani silamilu timersortarfiit, soorlu init timersortarfiit, inersuit timersortarfiit, naluttarfiit, timigissartarfiit aamma isikkamik arsartarfiit.
- Nujalerisut, tagiartuisartut, pinnersaasarfiit assigisaallu.
Akiuussutissamik kapitissimanngikkuit coronamik tunillatsissimannginnermut uppernarsaammik sivisunerpaamik nal. ak. 48-nik pisoqaassusilimmik takutitsinngikkaluarlutit isersinnaavutit:
- Pisiniarfiit
- Allakkeriviit
- Mittarfiit
- Pisortani oqartussaasut sulliviillu pilersuiviit kiffartuussinermi saaffiginnittarfii.
- Assartuutit tamanit atorneqarsinnaasut utaqqisarfii.
- Init suliannik ingerlatsivigisassatit.