Aalisarneq
Nuummi akit akigissaartitsiniunneq pissutigalugu qaffapput
Nuummi ingerlatsiviit pingasut qaleralilerngusaapput. Tamannali sivikitsuinnaasinnaavoq. Suliffeqarfiit arlaat ajalusuussagaluarpat akit appariarujussuarnissaat aalisartut ersissutigaat
Nuummi qalerallit tunineranni akiat ukiut marlussuit matuma siornatigut 16 koruuniuvoq. Maanna kiilumut 23-24 koruuneqalersimapput. Royal Greenlandip nassuerutigaa akit qaffasippallaartut, tunuarterumananili. Unammillertaa Kitaa Seafood patajaallisaajuminaatsitsivoq unammillerneq pissutigalugu.
Nuup eqqaani, maanna aalajangersimasumik pisassiiffiuneq ajortumi, aalisartut kisimik qaleralinnik iluanaarniarsinnaaneq takusimanngilaat. Royal Greenlandip ingerlatsiviillu namminersortut marluk Nuuk Fiship aamma Kitaa Seafoodip qalerallit sakkortuumik unammissutigaat.
- Uagut akit qaffassarsimanngilavut. Tunisinermi akit aalajangersarpavut unammillertitta akit qaffammatigit, Royal Greenlandimi nunanut tamalaanut tunisassiornermi pisortaq Lars Nielsen AG-mut oqarpoq. Unammillertaali Kitaa Seafood tusagassiortunut matoqqaniarnerulaarpoq.
- Oqaatigisinnaanngilara akit qanoq ittut attassinnaanerlutigit. Oqarsinnaavungali ingerlatsivittut nutaatut aningaasaqarnerput patajaallisaruminaatsikkipput, Kitaa Seafoodip pisortaa Robert Møller AG-mut oqarpoq.
Akigissaartitsiniunneq pissutigalugu aalisartut aningaasaateqarnerulerput. Umiatsiaararsortoq Nuup eqqaani ningittakkaminik amooriaraangami 6-700 kiilunik pisaqartarpoq. Tassa aningaasartuutit suli ilanngaatiginagit 15.000 koruunit missaannik isertitsisarput.
Allaaserineqartoq tamaat Nuuk Ugeaviisimi atuarneqarsinnaavoq. Nuummi pisartut pillugit aviisimi aamma allanik atuartoqarsinnaavoq. Aviisi akeqanngitsumik ataani aaneqarsinnaavoq: