Nuummi aggustimi ullut Aalborgimik sammisaqarfiusut
Naak aggusti suli ungasikkaluartoq, Nuummi Aalborgimut tunngasunik ulloqartitsinissanut, aggustip 14-iannit 17-iannut pisussanut maanna nalunaarfissaavoq kingulleq
Danmarkimi illoqarfittut ikinnguterput, Aalborg, aggustip qiteqqunnerani sammineqartussanngorpoq. Nunatsinnut assartuinermi umiarsualivik usilersorfiusartoq piffissami matumani Aalborgimit Aarhusimut nuunneqartussanngormat, kulturikkut inuussutissarsiornikkullu attaveqaatit annaaneqannginnissaat pingaaruteqarpoq. Nuummi Inuussutissarsiornermut Siunnersuisoqatigiit aaqqissuussinermi sallersaasussaapput.
Pingasoqiusamik sammisaqarnissaq
Aalborgimut tunngasunik ulloqartitsinerni silittumik ingerlatsinissaq siunertaralugu pingasoqiusanik avalequteqassaaq. Ilaatigut naalakkersuinermut, inuussutissarsiornermut, kulturimullu sammivilimmik ingerlatsisoqassalluni. Naalakkersuinermut tunngasunik arlalinnik suleqatigiissitsisoqartassaaq, tamatumani kommunini taakkunani marluusuni kommunalbestyrelsimut ilaasortat misilittakkaminnik avitseqatigiissinnaallutik suleqatigiinnerminnillu nukittorsaallutik. Inuussutissarsiornermik sammisaqarnerni ilaatigut inuussutissarsiorneq pillugu ataatsimeersuartoqassalluni, tamatumalu saniatigut suliffeqarfiit arlallit takuniarneqassallutik, neriunartumik nutaanik pisisartunik kinguneqarniartussat. Inuussutissarsiorneq pillugu ataatsimeersuarnermi qulequtarineqassaaq: Suleqatigiinnerit piujuaannartitsinermut aaqqissuussinertallit makkununnga tunngasut, sulisussarsiortarneq, pikkorissaanikkut qaffassaaneq aamma ilinniartitaaneq. Ulluni pineqartuni illoqarfimmi nipilersortoqartassaaq aamma Aalborg Symfoniorkesterit Aalborgimit tikeraanut ilaassapput.
Nuummik ilisimasaqarneq
Aalborgimut tunngasunik ulloqartitsinerni aamma pineqarpoq, illoqarfittut ikinngutigisatsinnit tikeraat Nuuk pillugu ilikkagaqarnissaat. Taamaattumik tikinneranni illoqarfimmi angallanneqarnissaat aamma kangerlummut umiatsiamik angalaarnissat arlallit pilersaarutaapput. Aaqqissuussinernut atatillugu aamma illoqarfinni ikinngutigiinni arpatsinissanik assigiinngitsunik isorartussusilinnik aaqqissuussisoqartassaaq. Nalunaartut apeqqutaatillugit suliffeqarfiit sorliit pulaarneqarnissaat aalajangiunneqassapput.
Peqataanissamut nalunaarfissaq kingulleq
Taamaattumik pingaaruteqarpoq illit suliffeqarfiutivillu aaqqissuussinernut nalunaarnissaat. Tamanna pisinnaalluni Sermersooq Business Councilip nittartagaatigut. Nalunaarfissaq kingulleq tassaavoq juunip 19-iat 2019. Tamatuma kingorna aaqqissuisunit misissorneqartassaaq suliffeqarfimmut pulaarnissamut aaqqissuussisoqarsinnaanersoq piareersaallunilu sulinerit aallarnisarneqassallutik aamma inuussutissarsiortunut ataatsimeersuartitsinerni suliffeqarfiit niueqatigiittussat naapinneri ataqatigiissaarneqassallutik.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...