Nuummi aatsaat taama saleersuartoqartigaaq

Piffiit marluk sanarfisassat inissaqartinniarlugit imaarneqartussaapput, taamaattoq Qasigiannguani umiatsiaatillit Qeqertanilu Containeriutillit amerlanerit suli maannamut nunaminertamik inissiivissaminnnik qisuariaateqarsimanngillat.

Angallatit umiatsiallu 200-230-t

- Qasigiannguani ukioq naallugu angallatit umiatsiallu 200-230-llu akornanni uninngatinneqartarput. Qinngorpumilu inissiivissami ullumikkut 130-t missaani qinnuteqaatit tigusimavagut. Tassa suli tamarmik nalunaarsimanngillat, Sanarfinermut Avatangiisinullu ingerlatsivimmi stabschefi Hans Henrik Winther paasissutissiivoq.

- Umiatsialivinni Qasigiannguanilu umiatsiaatillit piginnittui pissarsiariniarsarivagut pigisaat piffimmit nuunneqarniassammata. Pissarsiarisinnaanngikkutsigilli piginnittumut akiligassanngorlugu kommunip nuutsissinnavai. Piginnittuusulli attaveqarfigisinnaanngilluinnarutsigit nuunneqarneri kommunip nammineq akilertariaqassavai, stabschefi oqarpoq.

Containerit 300-t sinnillit

Qeqertani containerit 330-t missaaniipput, kisitsillli nalunaarutiginnittoqarnerit aallaavigalugit nikeralaartuarput.

- Biilinik containerik assigisaanillu eqqarneqarnerit kommunimit suliarineqaleereersimapput. Isumaqarpunga piffissami matumani 100-t missaani piareersimallutigit – pingaarnertut biilit containerilllu –, Hans Henrik Winther Johannsen Sermitsiaq.AG-mut paasissutissiivoq. Piginnittoq pissarsiarisinnaatillugu pineqartoq akiligassamik nassinneqartarpoq. Amerlanerpaatigulli piginnittoq kommunit pissarsiarineqarsinnaaneq ajorluni.

Ukiuni kingullerni saliineq annertunerpaaq

- Containerinik, umiatsianik assigisaanillu saliineq isumannaallisaanerlu annertunerpaavoq. Kommunalbestyrelsillu isumaqatigiilluinnarlutik politikkikkut tamanna tapersersimavaat. Tamanna pingaaruteqarluinnarpoq, illoqarfimmimi piffiit ilaat sanarfinernut atorneqartussat pineqarput, kommunimi stabschefi erseqqissaavoq.