Nuuk: Utoqqaat kiassaammik kiassarneeruttut eqqaamasigit
Utoqqaat sanngiinnerusullu ikiortariaappata, ilaqutaasut kommunip allaffianut politiinit saaffiginneqquneqarput.
Nuummi ataasinngornermi unnukkut nal. 23.00 innaallagiaaruttoqarneranit Nuummi kiassarnermik aamma pilersuisoqarunnaarpoq.
Tamanna isumaqarpoq Nuummi innuttaasut arlalissuit kiassarnermik pilersorneqarunnaarmata.
Peqqinnissaqarfik Kommuneqarfik Sermersoorlu innuttaasunik kaammattuipput ilaquttaminnik sanngiinnerusunik utoqqarnerllu ikiortariaqartunik ikiuuteqqullugit, kommunimullu pinartoqartillugu saaffiginneqqullugit.
- Utoqqaat innuttaasulluunniit sanngiinnerusut ikiortariaqarpata ilaqutaasut kommunimut, allaffimmut ornigullutik saaffiginneqquneqarput. Kommunimi saaffiginnittunut sullissisoqarpoq, politiit tusagassiorfinnut nalunaaruteqarlutik allapput.
Politiit qatserisartullu ingerlaarput
Kommuneqarfik Sermersuup utoqqaat innuttaasullu sanngiinnerusut kommunimit ikiorneqartartut maanna attaveqarfigisaqattaarpai.
- Innuttaasut politiinit qatserisartuniilluunniit ikiugassaagunik ornigullutik saaffiginnissapput. Nunaqarfinniittut kommunefogedinut ornigullutik saaffiginnissinnaapput. Illoqarfinni politiit angalaarput. Nuummi politiit biilii pingasut qatserisartullu biilii pingasut angalaarput, politiit ilisimatitsipput.
Peqqinnissaqarfiup pinartoqartillugu ornigullutik saaffiginnittut sullissinnaagai ilisimatitsissutigineqarpoq. Oqarasuaatikkummi saaffiginninnerit pisinnaanngikkallarmata.
Pinartoqavitsillugu attavissat
- Pinartoqavitsillugu Aasiaat Radio, 112-imut, saaffigineqarsinnaavoq. Tusass ilisimatitsivoq attavik ajunngitsoq, kipisaqattaarsinnaasorli. Saaffiginninniartut taamaattumik arlaleriarlutik sianerniartarsinnaanerat eqqaamaqquneqarpoq. Innuttaasut naatsorsuutigisinnaavaat nutaarsiassaqartitsivitsigut KNR Radiokkullu politiit ataavartumik nalunaaruteqaqattaarsinnaanerat, politiit ilisimatitsipput.
Sumiiffinni oqarasuaatikkut sianertoqarfiusinnaasuni Nuummi innuttaasut pisariaqartitsisut Kommuneqarfik Sermersuumut +299 367281-imut sianersinnaapput.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...