Nuuk: Utoqqaat illuannut pulaarnermi maleruagassat nutaat
Illoqarfiit pingaarnersaanni Covid-19 tuniluunnerulersimavoq. Taamaammat Kommuneqarfik Sermersooq maleruagassanik arlalinnik atuutsitsilerpoq, maleruagassat Nuummi utoqqaat illuanni utoqqarnut illersuissapput.
Utoqqaat illuanni najugaqartut tunillatsinnissaat pinaveersaartinniarlugu piffssami decembarip 23-aniit januarip aappaa ilanngullugu pulaartunut immikkut ittunik maleruagassanik pilersitsisoqarpoq.
Kommuneqarfik Sermersooq nittartakkamigut taamatut ilisimatitsissuteqarpoq.
Tamatumunnga Nuummi Covid-19-ip tuniluunnerulersimanera tunngavilersuutigineqarpoq. Ulluni arfinilinni kingullerni Nuummi inuit katillugit 197-it tunillatsissimasut, nunatsinni nakorsaaneqarfimmit kisitsisit ippassarnisat takutippaat.
- Ukiup sinneranut sanilliullugu nalliuttuni utoqqaat illuinut pulaartoqarnerusarnera nalinginnaasuuvoq. Ullumikkut tunillaassuuttoqarnerata kinguneranik maleruagassanik immikkut ittunik pilersitsisariaqarsimavugut, taamaaliornikkut pulaartut najugaqartunut tunillaaratarsinnaanerat annikinnerpaaffissaaniitinniarparput, Suliffeqarnermut Isumaginninnermullu Ingerlatsivimmi pisortaq Ejner Grønvold oqarpoq.
Maleruagassat utoqqaat illuanni najugaqartunut illersuutaassapput.
Pulaartut amerlanerpaamik pingasukkaartassasut
Piffissami pineqartumi utoqqaat illuani najugaqartut pingasunit amerlanerusunik pulaartoqaqqusaanngillat. Maleruaqqusat avaqqunneqarsinnaanngillat, taamatuttaaq pulaartunut ukioqatigiiaanut tamanut atuupput, aamma utoqqaat qaniginerpaasaannut, kommunimit ilisimatitsissutigineqarpoq.
Utoqqaat illuat tamanit iserfigineqarsinnaavoq, taamaammat pulaartut pulaarnertik tamaat qanermut assiaquteqartassapput. Tamtuma saniatigut tunillaassuunneq pinaveersaartinniarlugu pulaartut innersuussutit nalinginnaasut malissagaat kaammattuutigineqarpoq.
Pinaveersaartitsinermi innersuussutigineqarput:
- Napparsimaguit ersiuteqaruilluunniit utoqqaat illuinut pulaarnak
- Assatit asakulakkit imaluunniit assannut spritsi atoruk
- Talivit peqittarfianut quersorit/tangajorit, aamma qanermut assiaquteqaraluaruit
- Allat timaannik attugaqarneq killeqartiguk – assammiinak, ersakkut aparsinak, eqitaarinak il.il.
- Qanillinaveersaarit allallu taamatut ilioqqullugit
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...