Nuuk: Unnuami ataatsimi nakuusernerit sakkortuut marluk
Kalaallit Nunaanni politiit tallimanngornerup unnuaani ulapipput. Nuummi sakkortuumik marloriarluni nakuusertoqarpoq, suliani taakkunani politiit ilisimannittussarsiorput.
Akissarsisoqarsimanera pissutaalluni politiit tallimanngornermi ulapaarput.
Sakkortuumik nakuusertoqarsimaneranik sulianik marlunnik aallartitsisimallutik politiinit Julie Senderovitz Sermitsiaq.AG-mut oqarpoq. Sulianut ilisimannittussarsiorlutik ilisimatitsivoq.
- Marloriarluni sakkortuumik nakuusertoqarpoq. Siulleq Nuussuup Pisiffiata eqqaani bussit unittarfiata eqqaani pivoq, tassani arnaq pingasunit saassunneqarpoq. Suliaq maanna misissorparput, sakkortuumik nakuusertoqarsimanera ilimagaarput, oqarpoq.
Nakuusertut ima isikkoqarnerat nassuiarneqarpoq: Inuit pingasut, qernertunik atisallit qaamasunillu skoollit. Nakuuserneq tallimanngornerup unnuaani nalunaaquttaq 00-45-p 01.00-illu missaani pivoq.
Angut saassunneqartoq
Nuummi 'Manhattan'-iusimasup eqqaani allamik saassussisoqarpoq.
- Tassani angut nalunaaquttap 02.00-ip missaani saassunneqarpoq angutinit sisamanit imaluunniit tallimanit. Saassussisut qanoq isikkoqarnerannut tunngatillugu nassuiaanneqanngilagut. Taamaattoq saassussinermut atatillugu ilisimannittunik pisariaqartitsivugut, Julie Senderovitz oqarpoq.
Imigassartutorsimalluni biilertoq
Angut imigassartutorsimatilluni biilernermini biilimik apuivoq ullumi arfininngornermi.
- Biilimik apuisoqarneranut atatillugu ajoqqusertoqanngilaq, taanna pisoq Nuussuarmi pivoq nalunaaqutaq 09.50. Biilini aquttoq aalakoorpoq, maannakkullu misissuisoqaleruttorpoq biilini aqunnermini qanoq aalakoortigisimanersoq. Naliliinerput malillugu killigititaasoq qaangerlugu aalakoorpoq, ilisimatitsivoq.
- Kalaallit Nunaat tamakkerlugu politiit suliaat:
- Angerlarsimaffinni eqqissisaanerit: 25
- Suliani taakkunani meerartallit: 2
- Nakuusernerit: 8 (Nuummi tallimat)
- Aalakoorpallaartut: 12
- Imigassartutorsimallutik biilertut: 2
- Aqqusinermi eqqissiviilliornerit: 9
- Angerlarsimaffinni tikilluaqqusaanngitsut: 8
- Suliagut tamangajaavimmik imigassartutortoqarsimaneranik suliaapput. Unnuaq ulapippugut, soorlu akissarsisoqarsimagaangat taama ulapittartugut, Julie Senderovitz oqarpoq.
Nuummi politiit oqarasuaataat normqarpoq: 701448.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...