Nuuk: Qimmit imeqarfiup eqqaaniitinneqartut politiinut nalunaarutigineqarsinnaapput
Nuummi innuttaasut qimmitik imeqarfiup eqqaani aneeruttarpaat. Assitigut uppernarsarneqarpoq, inuit qimmiminnik qimmeqarfioqqusaanngitsumik allagartaqarfiusuni aneruussisartut. Imeqarfiup eqqaani qimmit aneerunneqaraangata taseq imeqarfiusoq mingutsinneqartarpoq.
Qaammatip aallartinnerani sapaammi nalinginnaalluinnartumi innuttaasup ataatsip Nuummi imeqarfiup Qallussuup eqqaani pisuttuartilluni, qimmit assigiinngitsut illoqarfiit pingaarnersaanni imermik pilersuiffiup eqqaani aneerunneqartut naapittarsimavai.
Innuttaasup takusani uppernarsarsinnaaniarlugit assilisarsimavai, assinilu ilanngutassiap matuma aallartinnerani takuneqarsinnaapput, Qallussuup eqqaani qimmeqarfioqqusaanngitsutut allagartaqarfiusumi qimmit aneruunneqartut.
- Qimmit Qallussuup eqqaani qimmeqarfioqqusaanngikkaluartoq aneerunneqartarnerat ajuusaarutigaarput. Innuttaasut sakkortunerpaamik kaammattorusuppavut, Qallussuup eqqaani qimmiminnik aneerussinerminni, grillerinerminni nalunnerminniluunniit tamatta imissatsinnik mianerinneqqullugit, kommunimit oqaatigineqarpoq.
Kommuneqarfik Sermersuup innuttaasunut arlaleriarluni ilisimatitsissutigisarsimavaa, imeqarfimmi naluttoqartassanngitsoq imaluunniit imeqarfiup eqqaani grillerisoqaranilu qimminik aneerussisoqartassanngitsoq, ilisimatitsissutigineqartartulli ikiuutaavallaarpasittarsimanngillat.
Kommunimit erseqqissaassutigineqarpoq, innuttaasut kommunimit peqquneqarsinnaasut, tamannalu iluaqutaanngippat politiinut unnerluussinermik kinguneqarsinnaasoq.
- Pisumi matumani kina malittarisassanik unioqqutitsisimanersoq naluarput, taamaammat iliuuseqarfigisinnaanngilarput. Imeqarfiup killingani pisinnaasunut malittarisassat arlaata unioqqutissimagaat uppernarsaatissaqartikkaagatsigu peqqussummik nassiussisarpugut, peqqussutigineqartorlu iluaqutaanngippat politiinut unnerluussisoqarsinnaalluni, kommuni Sermitsiaq.AG-mut ilisimatitsivoq.
DMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...